Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев «Күзелдер Шивизи» деп бүгү-российжи ачы-буян акциязы-биле элээн каш уругларның улуг күзелдерин күүсеткен.
Таңды кожууннуң Межегей суурундан он чеди харлыг Кежик хаак спортун сонуургаар, ол республика чергелиг маргылдааларның каш дакпыр тиилекчизи. Оол бодунуң арга-дуржулгазын бедидер болгаш эки түңнелдерни көргүзер дээш, хаактаарынга белеткенир дериг-херекселдиг болурун күзээн. Тыва Республикада федералдыг инспектор Шолбан Монгуш бүрүн эргелиг төлээ Анатолий Серышевтиң Кежикке белээн дамчыдып, чаа чылда спортчу чедиишкиннерни болгаш улуг тиилелгелерни күзээн.
«Күзелдер Шивизи» акцияга бүрүн эргелиг төлээниң киржири – чаагай чаңчыл. 2023 чылда Сибирьниң регионнарындан база Луганск Улус Республикадан он үш оолдуң, эрткен чылын сес сибирьжилерниң чаа чыл күзелдерин амыдыралга боттандырган.
«Күзелдер Шивизи» акция Россияның Президентизи Владимир Путинниң эгелээшкини-биле 2018 чылда эгелээнин сагындыраал. Төлевилел Чаа чылдың хуулгаазынын боттандырып, кижилерниң улуг күзелдерин күүседир дээн буянныг кижилерни каттыштырып турар.
Акцияга амыдыралдың берге байдалынга таварышкан, кадыының байдалы кошкак уруглар, өскүс болгаш чединмес өг-бүлелерниң 3 хардан 17 харга чедир ажы-төлү киржип турар. Тускай шериг операциязынга киржип турар болгаш ЛУР, ДУР, Запорожье база Херсон областарның девискээринде чурттап турар шериг албанныгларның өг-бүлелеринден уругларже онза кичээнгей угланган. Алды чыл дургузунда 213 муң ажыг уругларның эң-не улуг күзелдери боттанган.