Тываның прокуратуразынга Россия Федерациязының прокуратуразының үндезилеттинип тургустунганындан бээр 303 чылынга тураскааткан байырлыг хемчег болуп эрткен. 1722 чылдың январь 12-де Пётр I-ниң чарлыы-биле орус прокуратура албаны тургустунганын, оон бээр-ле прокурорлар хамаатыларның эрге-ажыын камгалаар дээш уйгу-чыдын чок ажылдап чоруурун сагындыраал.
Байырлалдың хемчээнге Тываның Баштыңы Владислав Ховалыг, регионнуң прокурору Сергей Дябкин, Тыва Республиканың Дээди Хуралының (парламентизиниң) даргазы Каң-оол Даваа, ол ышкаш кожууннар прокуратуразының аппарат ажылдакчылары болгаш прокурорлар киришкен.
Тываның Баштыңы Владислав Ховалыг прокуратураның ажылдакчыларынга профессионал байырлалы-биле байыр чедирип, оларның ажылының ниитилелге чугулазынужур-дузазын чугаалаан.
«Бөгүн онзагай хүнде, регионнуң социал-экономиктиг хөгжүлдезинге бирги чергениң чугула айтырыгларын шиитпирлээринге идепкейлиг киржилгеңер дээш өөрүп четтиришкинни илередип көрейн. Силерниң деткимчеңерге онза хереглелдиг Тываның чурттакчыларының хоойлу езугаар сонуургалдарын камгалаары – силерниң кол ажылыңар. Бистиң дугуржулгавыс езугаар, хоойлу хажыдыышкыннарын болдурбас болгаш социал-экономиктиг кол сорулгаларны чедип алырынга эң-не таарымчалыг шиитпирлерни кады тып ажылдап турар бис. Ол кады ажылдажылга кем-херек үүлгедиишкиннериниң деңнелин эвээжедиринге болгаш хүлээп алдынган хоойлу-дүрүмнерниң шынарын экижидеринге дузалаар» - деп, ол демдеглээн.
Тываның Баштыңы оон аңгыда, тускай шериг операциязының киржикчилерин болгаш оларның өг-бүлелерин деткиир талазы-биле прокуратураның идепкейжи ажылын онзалап демдеглээн. «Прокуратураның ажылдакчылары дайынчыларга гуманитарлыг дузаны чыырынга кончуг идепкейлиг. Ол дээрге бистиң чуртувустуң ниити херээнге үнелеп четпес үлүг-хуу-дур».
Республиканың прокурору Сергей Дябкин база коллегаларынга, прокуратураның хоочуннарынга болгаш пенсионерлерге профессионал байырлалы-биле байырны чедирген. Хайгаарал ведомствозу хамаатыларның эргелерин болгаш эрге-ажыын камгалаарынга бүзүрелдиг ынаныш болуп турарын ол айыткан.
«Прокуратураның хоочуннарынга, ол ышкаш бөгүнде хоойлу камгалалында турар аныяк специалистерге профессионал чоруу болгаш ажылынга бердингени дээш четтиргеним илередип тур мен» - деп, Тываның прокурору онзалап демдеглээн.
Хоойлу-дүрүмнү болгаш корум-чурумну быжыглаарынга боттарының билиг-мергежилин көргүскен ажылдакчыларга шаңналдарны тывыскан. Республиканың прокурорларының чедиишкиннерин Россия Федерациязының чиңгине прокурорунуң хүндүлел бижиктери-биле демдеглээн, а республиканың прокурорунуң дужаалы-биле хамаатыларның эрге-ажыын камгалаарынга, корум-чурумну быжыглаарынга киирген үлүг-хуузу дээш 27 ажылдакчыны шаңнаан.