Республиканың журналистер ниитилежилгезиниң төлээлери, типогграфия болгаш үндүрүлге ажылының ажылдакчылары профессионал байырлалын демдеглээн. Январь 13-те, Россияның Парлалга хүнүнде, «Кызыл Гранд отель»-ге эрткен байырлыг хуралда адырның төлээлерин шаңнап мактап болгаш байырлыг концертти көргүскен.
Бөгүнде Тываның массалыг информация чепсектеринде 58 аттыг – 32 парлалга үндүрүлгелери, солуннар болгаш сеткүүлдер, 20 интернет-үндүрүлгелер, дөрт радиоканал, ийи телеканал бар. Россияның Журналистер эвилелиниң регионалдыг салбырында 171 журналист бактааттынган. Бо чылын республиканың хоочун коллективтери улуг юбилейлерин демдеглээр: «Шын» солун 100 чылын, «Сылдысчыгаш» солун 80 чылын, а Тываның ном үндүрер чери 95 чылын.
Тываның Баштыңы Владислав Ховалыг байырлалда чыглып келген хоочуннарга база редакциларның амгы ажылдакчыларынга байрын чедирген:
«Байырлалды Парлалга хүнү деп адаза-даа, дүрген өскерлип турар технологияларны барымдаалап, информацияны тарадып турарының хемчээли парлалга тиражындан ажа берген - деп, ол массалыг инфомация чепсектериниң төлээлеринге чугаалаан. – Делегей канчаар-даа өскерлип турза, силерниң ажылыңарның үндезини, бир дугаарында, сөсте. А ол сөс кижилерни каттыштырып, оларны ажыктыг ажыл-херектерже сорук киирер улуг күштүг».
Тываның Баштыңы регионнуң МИЧ төлээлекчилеринге республикада бүгү-ле чугула болуушкуннарны, эрткен чыл ындыг хемчеглер хөй болганын демдеглевишаан, оларны доктаамал чырыдып, деткип чорууру дээш, четтиргенин илереткен. Республикага эрткен чыл улуг төөгүлүг – ССРЭ-ниң составынче эки тура-биле каттыжып киргениниң 80 чылын демдеглээн. База ол ышкаш юбилейлиг чылдың кол болуушкуннарының бирээзи – Россияның Президентизи Владимир Путинниң Тывага келгени болган. Чаа чуртталга бажыңнарының тудуунуң шапкынчааны, чиигелделиг ипотека программазы, чаа котельнаялар тудуу, суггарылга системаларының чаартылгазы, кижилерге, ылаңгыя ажы-төлдүг өг-бүлелерге социал деткимчениң бүгү хемчеглерин хандырган бюджеттиң саң-хөө турум чоруу – Президентиниң бистиң республикага келгениниң соонда, дыка хөй айтырыгларны деткээниниң бадыткалы.
Владимир Путинниң Ада-чурт камгалакчызының чылы кылдыр чарлаан 2025 чыл – Ада-чурттуң Улуг дайынының үезинде база амгы үеде тыва дайынчыларның маадырлыг чоруктарының дугайында хөйге чугаалаарынга эптиг арга дээрзин Владислав Ховалыг демдеглээн. Эрткен чылын Президентиниң культурлуг инициативалар фондузунуң деткимчези-биле “Тываның дайынчылары – “Кара өлүмнүң” салгакчылары” деп журналисчи төлевилелди боттандырган. Регионнуң журналистер ниитилели 2025 чылда ону “Тыва оолдарның маадырлыг чоруктары. Мөңге алдар” деп төлевилел-биле уламчылаарын саналдаан. Тываның кол тураскаалының хүндүлүг даңзызынче кандыг-бир чылдагаан-биле кирбейн барган кижилерниң аттарының даңзызын чыыр улуг хемчээлдиг ажылга республикада массалыг информация чепсектери шупту каттыжар.
« Бодунуң амы-тынын бодавайн, оок-боону холунга туткаш, Төрээн чуртун камгалаан болгаш камгалап чоруур шупту кижилерни төөгүже киир бижиири – бистиң хүлээлгевис. Кызылда Тиилелге шөлүнде тураскаалдарга Ада-чурттуң Улуг дайынының киржикчилериниң аттарын мөңгежидер ажылды уламчылаар дээн республиканың журналистер ниитилежилгезиниң инициативазын албан деткиир мен» – Тываның Баштыңы чугаалаан.
Республиканың медиа-хүрээлеңинге ажылдаан чылдарында шылгараан төлээлерни профессионал байырлалында күрүне шаңналдары-биле шаңнаан.
«Тувинская правда» солуннуң улуг кореспондентизи Кривдик Елена Андреевнага «Тыва Республиканың алдарлыг ажылдакчызы» хүндүлүг атты ТР-ниң Баштыңының чарлыы-биле тывыскан.
Тыва Республиканың Баштыңының Өөрүп четтириишкин бижиктери-биле:
Информастыг политика департаментизиниң килдис начальниги Монгуш Орлана Лавкиновнаны;
«Тывамедиагрупп» четки үндүрүлгезиниң кол редактору Иванов Николай Михайловичини;
«Тува 24» телеканалдың оператору Донгак Чай-Хаан Романовичини;
ГТРК «Тыва» КТРК кол экономизи Чэнь Анжелика Эртинеевнаны шаңнаан.
Тыва эстраданың сылдыстары – Тываның улустуң артизи Станислав Ириль, Тываның алдарлыг артизи Сайлык Оммун, «Ят-Ха» бөлүктүң солизи Шолбан Монгуш, «Тыва» бөлүктен Артур Дамдын-оол, Тываның күрүне филармониязындан Экер Кара-Сал база Кызылдың уран чүүл колледжизиниң студентилери медиа ниитилледиң төлээлеринге солун концертти бараалгаткан.