«2021-2025 чылдарда кадык камгалалының бирги звенозун эде чаартыры» күрүне программазының күүселдези чаа 2025 чылда Тывага уламчылаар. 2024 чылдың планы езугаар Өвүр кожууннуң Дус-Даг биле Саглы, Чеди-Хөл кожууннуң Элегес, Бай-Тайганың Шуй суурларга, ол ышкаш Каа-Хем кожууннуң Бояровка, Авыган, Көк-Хаак, Улуг-Хем кожууннуң Ийи-Тал, Чөөн-Хемчик кожууннуң Ийме суурларга фельдшер-акушер пунктуларын Чаа чылдың байырлал хүннеринде ажыткан. Эрткен чылдың чыл эгезинде Бии-Хем кожууннуң Хүт суурда база Чөөн-Хемчик кожууннуң Баян-Талада ажыглалче кирген ФАП-тар-биле кады, 2024 чылда ниитизи-биле көдээ черлерде 12 кадык камгалал объектизи туттунган.
«Албан черлерин амгы үениң стандарттарынга дүүштүр туткан. Президентиниң идип үндүргени “Узун болгаш идепкейжи назын” национал төлевилели-биле кадык камгалал адырын чаартыр ажылдар чоруп турар. Чурттакчыларга эмчи дузазын көргүзеринге, республиканың төп кожуун эмнелгелериниң болгаш тускайлаттынган эмнелге черлериниң эмчилери-биле диспансеризацияларны болгаш телемедицина консультацияларын организастаарынга таарымчалыг байдалдарны тургускан» - деп, Тываның Баштыңы Владислав Ховалыг бодунуң блогунда демдеглээн.
Чаа фельдшер-акушер пунктуларын эмнелге албан черлериниң шупту санитарлыг негелделеринге дүүштүр чаңгыс аай аян-хевир-биле туткан: изиг болгаш соок суг хандырылгазы бар, телемедицина консультацияларын алыры-биле Интернетте кошкан. Авыйган суурда ФАП-ты бир-ле дугаар ажыткан. Ооң мурнунда бо суурнуң чурттакчылары эмчи дузазын алыр дээш, 10 километр ыракта кожа суурже чоруп турганнар. Бояровка суурга ооң мурнунда турган пунктудан элээн улуг кылдыр туткан чаа ФАП 608 чурттакчыны хаара туткан.
Президентиниң «Кадык камгалал» национал төлевилелин боттандырып эгелээн үеден бээр чүгле беш чыл иштинде, Тывада 45 ФАП база 8 эмнелге амбулаториязы туттунган, республиканың эмнелге албан черлери чартык муң санныг эмнелге дериг-херекселдерин алган, ооң ачызында бедик технологтуг хыналданы үе шаанда эрттирип, аарыгларны болдурбас база эмнээр аргалар экижээнинден чурттакчы чоннуң кадыкшыл байдалының көргүзүү экижээн. «Кадык камгалал» национал төлевилел езугаар эргижирээн эмнелгелер, амбулаториялар база ФАП-тарга капитал септелгелерни чорудуп, Тываның 17 эмнелге албан черлерин эде кылган.
«Кадык камгалалының бирги звенозун эде чаартыры» программаның ачызында, Ленин кудумчузунда, 44 дугаарлыг ийи каът бажыңга турган бир улуг объект - республиканың 1 дугаар эмнелгезиниң поликлиниказы чаа тынышты алган. Улуг септелгелер консультативтиг-диагностика поликлиниказының ажылын экижидип, хоорай болгаш кожууннарның чурттакчыларынга, эмчилерниң болгаш ортумак деңнелдиң эмчи ажылдакчыларының ажылынга таарымчалыг байдалдарны тургускан.
«Кадык камгалалы» деп национал төлевилелдиң “Кадык камгалалының бирги звенозун эде чаартыры” күрүне программазының акша-хөреңгизи-биле 2024 чылда туткан объектилер аразындан Тожу кожууннуң Ырбан суурда ФАП тудуу бо чоокку хүннерде ажыглалче кирер.