Бо чылын республика девискээринге чурттаар оран-сава садып алыр дээн хамаатыларга 2 хуу чедир ставкалыг чиигелделиг ипотеканы кииргенинден Тывада чуртталга тудуу деткимчени ам база алыр. Тываның Баштыңы Владислав Ховалыг республиканың чурттакчыларынга чиигелделиг ипотеканы бээриниң аргаларын дугуржуп алганының дугайында дыңнаткан.
“Кол чүүл – 2 хууну камгалап алыр аргалыг болдувус. Мындыг берге үеде Президентивис Владимир Владимирович Путинниң деткимчези-биле бистиң республикага хөй ажы-төлдүг, ооң иштинде аныяк өг-бүлелерге чурттаар оран-сава садып алыр арганы бээр эң-не чугула программаны уламчылаарын чедип алганывыска өөрүп тур мен” – деп, ол бо чылын регионга чуртталга тудуун деткиир хемчегниң дугайында бодунуң блогунда дыңнаткан.
Сөөлгү каш чылдарда Тывага чиигелделиг ипотекадан аңгыда, республиканың социал-экономиктиг хөгжүлдезиниң тускай программазының (ИПСЭР) акша-хөреңгизин тус черниң тудуг материалдарының бүдүрүлгезин деткииринче угландырганы - чуртталга тудуунуң темпизин улгаттырарынга идигни берген. Эрткен чылын субсидия алган бүдүрүкчүлер 70 муң куб метр бетонну, 6 млн тууйбуну, 100 муң куб өске-даа тудуг материалдарын (сай-даш, элезин..) бүдүрген.
Бүдүн чуртта ышкаш, бистиң регионга база боттанып эгелээр бир чугула хемчег - ТШО киржикчилериниң аныяк өг-бүлелеринге чурттаар оран-сава садып алыр социал төлевир деткимчезин бээри. Бо чылдан эгелеп ындыг өг-бүлелер чурттаар оран-сава садып азы тудуп алырынга, ол ышкаш амгы үеде чурттап олурар оран-савазын улгаттырарынга база ипотека чээлизин дуглаарынга ол төлевирлерни бирги оочурда алыр. Регионалдыг Тудуг яамызы ындыг өг-бүлелерниң даңзызын тургузуп, федералдыг эрге-хоойлу актылары езугаар тайылбыр ажылын чорудуп турар.
Ол ышкаш Тывада тускай шериг операциязынга мөчээн дайынчыларның өг-бүлелери чаа бажыңнардан квартира садып алырынга 5 хуулуг немелде чиигелдени ап болур. Тываның Баштыңы Владислав Ховалыгның 2024 чылдың январьда Дээди Хуралга Айыткалында даалгазы езугаар ол хемчегни киирген.