Чаа чыл бүдүүзүнде Тываның Баштыңы салым-чаяанныг аныяк ыраажы Денберел Ооржак-биле ужурашкан. Бистиң республикадан үнген эстрада сылдызын сөөлгү айларда төп телеканалдардан хөйү-биле көрүп болур. Чаңгыс чер-чурттуувустуң "Одинокая луна" деп хит ырызы Шаман, Алексей Гоман дээн ышкаш алдарлыг ыраажылар-биле кады «Новая волна» радиога эң-не тергиин үштүң аразынче киирген.
Республиканың Баштыңы-биле аныяк ыраажыга доктаамал деткимчени көргүзүп чоруур болгаш, Денберел Ооржактың келир байырлалдарда болгаш келир чылда планнары-биле үлешкен. Аныяк оол өг-бүлезиниң эң-не ынак байырлалын бажыңынга чоок кижилери-биле демдеглеп, ооң соонда Москваже чанып келгеш, чогаадыкчы ажылын уламчылаарын планнап турар.
«Россия Федерациязының Улустуң артизи, сураглыг композитор Игорь Яковлевич Крутойнуң деткимчези-биле бистиң Денбереливис Россия деңнелиниң артизи болуп өзүп, көдүрлүп келген» — деп, Владислав Ховалыг демдеглээн. — Бичии чажыдывысты үлежип болур мен - билдингир ыраажы-биле кады ол ыры бижидер деп турар. Удавас оларның кады ажылдажылгазының түңнелин дыңнаар бис деп идегеп тур мен. Денберелге бурунгаар чүткүлдү, Тываны төлээлеп чоруурун кажан-даа утпайн, хөгжүм делегейинге чаа бедиктерже үнүп кээрин сеткилим ханызындан күзедим».
Владислав Ховалыг «Тывамедиагрупп» холдингинге база «Тыва 24» телеканалга Денберел Ооржактың концерттерин дорт дамчыканы дээш четтиргенин илереткен. Декабрь 29-та ыраажы Виктор Көк-оол аттыг Национал театрга ийи концертин көргүскен. Оларның бирээзин ачы-буянныг кылдыр эрттирген – тускай шериг операциязының киржикчилериниң өг-бүлелерин концертинче чалаан. Аныяк ыраажы ийи шак дургузунда шупту билдингир ырыларын күүсеткен, оларның аразында аңаа тускай бижип берген ырылар, ол ышкаш орус болгаш делегей чергелиг хиттер бар. Ыраажы төрээн дылында ырылардан англи дылда билдингир хиттерже белени-биле шилчээн. Аныяк ыраажының концерттери чаңгыс чер-чурттугларынга ёзулуг белек болган.
Ыраажы ачы-буян концерттеринге киржир чалалгаларны күзелдии-биле хүлээп, ол ышкаш СВО киржикчилерин деткип чоруур. Мооң мурнунда ол РФ-тиң Президент Администрациязының чалалгазы-биле тускай шериг операциязының мурнуку одуруунда шериг албанныгларга, оларның аразында бистиң чаңгыс чер-чурттугларывысга ырлаан. Денберел чуртунга чанып келгеш-ле, маңаа концерттеринге белеткенип эгелээн.
«Бодумнуң концертим-биле чаңгыс чер-чурттугларымга, Төрээн черимге аажок ынак мен дээрзин көргүзүкседим» - деп, ыраажы чугаалаан.
Денберел Ооржактың бүгү Россияга алдар-ады НТВ каналдың «Сен супер сен!» Супер сезон" деп хөгжүмнүг төлевилелинге тиилелгези-биле эгелээн. Кызыл-Мажалык суурнуң чурттакчызы көдээ уран чүүл школазынга эге билиглерни ап, аңаа ыры талазы-биле өөренип турган. Оон бээр хөгжүм мөөрейлериниң доктаамал киржикчизи, ооң иштинде төрээн республика чергелиг «Уран чүүлдүң челээжи», Россияның «Чырык херелдер» база делегей чергелиг «Кинотаврик» уран чүүл фестивалынга тиилелгелерни чедип алган.
2019 чылда Денберел ада-иезиниң хайгааралы чок арткан уруглар болгаш аныяк өскеннерге «Сен супер сен!» деп телешоунуң үшкү сезонунга киришкен. Ынчан ол Nazareth рок-бөлүктүң «Love hurts» деп ырызын күүсеткеш, жюриниң бедик үенелелин алган. Денберел Анастасия Симоганова-биле кады бирги черни үлешкеннер. Аныяк ыраажы дараазында шоуга база катап киришкеш, база бирги черни ээлээн. Денберел «Детская Новая волна» мөөрейге тиилээш, «Детское Евровидение» конкурска киришкен. Аныяк ыраажы "Сен супер-дир сен!" деп шоуга киришкен соонда, Россияның Улустуң артизи, сураглыг композитор Игорь Крутой-биле үр болгаш үре-түңнелдиг кады ажылдап турар.
Денберел Ооржак хөгжүмден аңгыда футбол ойнаарынга ынак. Ынчалза-даа аныяк ыраажы профессионал артист болурун шилип алган.