Хүндүлүг чаңгыс чер-чурттугларым!
2024 чыл чугула төөгүлүг болгаш социал болуушкуннар-биле долган. Улуг юбилейлиг чылды – российжи чоннарның улуг өг-бүлезиниң составынче тыва чонну киирериниң дугайында шиитпирни 1944 чылда хүлээп алганының чугулазын медереп билир арганы биске берген, Тыва Арат Республиканың ССРЭ-ниң составынче эки тура-биле киргениниң 80 чылын демдеглеп эрттирдивис.
Эрткен чыл биске база шенелделерниң чылы болган. Профессионал демнежилге болгаш хөй-ниитиниң идепкейлиг деткимчези-биле Шагаан-Арыгда коммунал үрелиишкиннерин болгаш арга-арыг өрттерин ажып эртеринге дузалаан. Бо дээрге кажан кижилер айыылдыг байдалдарда боттарының эң эки шынарларын көргүскен үнелиг арга-дуржулга-дыр. Бистиң шериг албанныг кижилеривиске республиканың сагыш човаачал чурттакчыларының деткимчези - тускай тема болур. Ада-чурттуң камгалакчылары Тываның чурттакчыларынга фронтуже Чаа чылдың гуманитарлыг чүъгүн чедиргенинге өөрүп четтиргенин илереткеннер.
Россияның Президентизи Владимир Владимирович Путинниң республикага чедип келгени 2024 чылдың кол болуушкуну болган. Ол Тываның төөгүлүг оруун, хөй националдыг Россияның тургустунарынга бистиң чонувустуң киирген үлүг-хуузунга бедик үнелелди берген.
Президент бисти дыка хөй айтырыгларга деткээн – чаа чуртталга бажыңнарының тудуун өстүреринге, чиигелделиг ипотека программазынга, чаа котельнаялар тударынга, суггарылга системаларын чаартырынга, кижилерге, ылаңгыя ажы-төлдүг өг-бүлелерге социал деткимчениң шупту хемчеглерин хандырар аргалыг бюджеттиң саң-хөө талазы-биле турум чоруунга. Чуртуң удуртукчузунуң деткимчези биске бурунгаар хөгжүлдеге күштүг идигни берген. Мурнувуста ажылдар хөй.
2025 чыл, Улуг Тиилелгениң 80 чылы, биске Ада-чурттуң хосталгазы дээш бедик маадырлыг чоруктуң төөгүлүг чижектерин берип, Төрээн чуртунга ынакшылдың, Россияның хөй националдыг чонунуң чаңгыс демниг чоруунуң болгаш туруштуг чоруунга күштүг үлегерни берген.
Үнүп орар 2025 чылда бистиң күжүвүс быжыгып, бүгү-ле планнап алган эгелээшкиннеривис боттаныр болзун.
Чаа чыл-биле сеткилим ханызындан байырымны, йөрээлдеримни хүлээп ап көрүңерем! Россияның болгаш Тываның алдар-ады дээш кижи бүрүзүнге чаа-чаа чедиишкиннерни, быжыг кадыкшылды, тайбыңны болгаш буянны күзедим!