Декабрь 28-те «Чедер» республиканың кадык камгалал чери санаторлуг-курорт эмнээшкин адырында эмнээшкин ажыл-чорудулгазын чорудар албан езузунуң чөпшээрелин алган. Албан чериниң чиңгине директорунуң оралакчызы Ай-Хаан Догур-оолдуң демдеглээни-биле алырга, ол чөпшээрел санаторийге эмнээшкин ачы-дузазының хөй хевирлерин, ооң иштинде дараазында адырларны көргүзер арганы бээр:
— эмнээшкинниг күш-культура;
— эмнээшкинниг массаж;
— Неврология;
— кадык камгалын база хөй-ниитиниң кадык камгалалын, эпидемиологияны организастаары;
— сестралар ажыл-херээ;
— терапевтиг эмнээшкиннер;
— физиотерапия.
Ай-Хаан Догур-оолдуң чугаазы-биле алырга, “Чедер” санаторийинге лицензияны алыры чүгле аарыг кижилерниң кадыын быжыглаар эвес, а профессионал эмчи эмнээшкиннерин берип, көргүзүп турар ачы-дузаның шынарын элээн бедидер.
Оон аңгыда декабрь 22-ден эгелеп санаторий санаторлуг-курорт албан черлериниң реестринче кирген. Ол чүүл албан чериниң курорт хевирлиг аалчылар бажыңы кылдыр ажылдап эгелээринге идиглиг. Чиңгине директорнуң оралакчызы 2025 чылдың январь 3-тен эгелеп санаторий клиентилерден билдириишкиннерин хүлээп эгелээрин дыңнаткан.
«Чедер» курортче путевка садып алырда, Кызыл хоорай, Интернациональная кудумчузу, 106 дугаарлыг бажыңда турар садыглажылга килдизинче долгап болур. Харылзажыр телефону: +7 (913) 340-55-66.
2020-2024 чылдарда Тыва Республиканың социал-экономиктиг хөгжүлдезиниң бот-тускайлаң программазының деткимче-биле кадыкшылга черин катап тутканын сагындыраал. Чурттуң Президентизиниң даалгазы-биле тускай хөгжүлде програмазын 2030 чылга чедир узаткан.