Декабрьның 28-те, Чаа чылдың бүдүүзүнде, В.Көк аттыг Национал хөгжүм-шии театрынга республиканың хөгжүлде-сайзыралынга улуг үлүг-хуузун киириштирген хоочуннарга, онза байдалдар үезинде боттарының үлүүн каттыштырып тулушкан оолдарга, чону-биле деңге ажылдаан болгаш улуг чурттуң хамаарышпас чоруун камгалаар дээш эрес-дидим тулчуп чоруур дайынчыларга, ачы-буян чыылдазының идепкейжилеринге база спорт адырының төлээлеринге күрүне шаңналдарын тыпсыр езулал болуп эрткен.
Тываның Баштыңы үнүп олурар Чаа чыл-биле чыылганнарга байырын чедирип, эртип турар чылда республика чонунуң кызымаккай күш-ажылы, буругаар чүткүл-биле онзагай болуушкуннар хөй болганын демдеглеп, чаа үнген чылда ол-ла тура-сорукту салбайн, бир демниг ажылдаарын кыйгырган.
Россияда чарлаттынган Өг-бүле чылында республикага хөй санныг янзы-бүрү хемгелер эрткен. Тыва өг-бүлелер Тываның адын российжи мөөрейлерге төлептиг төлээлеп, шаңнал-макталдарын алганын демдеглээн. Чурттуң Баштыңы ие-чаштың камгалалынче, өг-бүле институдун быжыглаарынче угланган айтыышкыннарны берген. Өг-бүле, ооң ужур-чаңчылдары, үнелиг чүүлдери – күрүне тургузуунуң үндезин быжыглап турарын ол айыткан.
Ынчангаш күрүне шаңналдарын тыпсып эгелээрде, үлегерлиг өг-бүлени демдеглээн шаңналды тывысканы улуг ужур-уткалыг.
Россия Федерациязының Президентиниң Чарлыы-биле, өг-бүле институдун быжыглаарынга база ажы-төлдү кижизидип-өстүреринге улуг ачы-хавыяазы дээш “Ада-иениң алдары” орденниң медалы-биле дөрт ажы-төлдүң ада-иези Николай Кертик-оолович биле Валентина Сандан-ооловна Монгуштарны шаңнаан.
Тудуг адырынга ачы-хавыяазы дээш “Россияның хүндүлүг тудугжузу” демдек-биле Тыва Республиканың хоорай, суурларын планнаар болгаш тудар, хамааты тудуг төлевилел институдунуң кол специализи Валентина Михайловна Токманьны, техниктиг килдис начальниги Анатолий Лакпаевич Оюнну база “Тыва тудуг” акционерлиг ниитилелдиң чиңгине директору Маадыр-оол Ангыр-оолович Кыргысты шаңнаан.
Тыва Республиканың Баштыңының Өөрүп четтириишкин бижиктерин: чүък автомашиналарының 2 дугаар акционерлиг ниитилелиниң чиңгине директору Дмитрий Владимирович Черевкога (сайгарлыкчы чорукту хөгжүдеринге улуг үлүг хуузу болгаш тускай шериг операциязының киржикчилерин деткииринге идепкейжи дузазы дээш), Кызылдың президентиниң кадет училищезиниң математика, информатика богаш информастыг-коммуникация технологияларының башкызы Ольга Павловна Магеряга (өөредилге адырында хөй чылдарда ак сектилиг ажылы болгаш профессионла чедиишкиннери дээш), Россияның ОБЯ Тываның дилээшкин-камгалал отрядының дилеп-тывар кезээниң камгалакчызы Сайын Чадамбаевич Дугар-оолга (үре-түңнелдиг күш-ажылы болгаш онза байдалдар уржуктарын чайладырынга киржилгези дээш) тывыскан.
Дайынчы хүлээлгезин күүседип турар көргүскен эрес-дидим, маадырлыг чоруу дээш “Тускай шериг операциязының киржикчизинге” тураскаал медаль-биле 46106 шериг кезээниң мотоадыгжы батальонунуң улуг адыгжызы Чайдаш Орлан-оолович Ооржакты шаңнаан.
Тыва Республиканың Баштыңының Хүндүлел бижиктерин: орук-тудуг адырынга бедик көргүзүглерни чедип ап, хөй чылдарда ак сеткилдиг ажылдааны дээш “Восток” КХН-ниң чиңгине директорунуң тудуг талазы-биле оралакчызы Андрей Николаевич Гриченкога, «Россети Сибирь Тываэнерго» АН-ның чырык энергиязының ачы-дузаларын боттандырар база учеттаар эргелелдиң начальниги Елена Петровна Коротцевага база өрүмнээр дериг-херексел машинизи Сергей Викторович Городиловка тывыскан.
Көдээ ажыл-агый адырынга хөй чылдарда ак сеткилдиг ажылы дээш көдээ ажыл-агыйының хоочуну Петр Тимофеевич Найдан-оолга “Тыва Республиканың көдээ ажыл-агыйының алдарлыг ажылдакчызы” хүндүлүг атты тывыскан.
Тыва Республиканың чыынды командаларының спортчу белеткел төвүнүң улуг тренери Самет Калзанович Чимбиян “Тыва Республиканың күш-культура болгаш спортунуң алдарлыг ажылдакчызы” хүндүлүг атты күш-культура болгаш спортту хөгжүдеринге ачы-хавыяазы, хөй чылдарда ак сеткилдиг ажылы дээш алган.
Республиканың уруглар эмнелгезиниң тускай салбырының гастроэнтеролог эмчизи Екатерина Нортатовна Иргитке кадык камгалал адырында ачы-хавыяазы болгаш хөй чылдарда ак сеткилдиг ажылы дээш “Тыва Республиканың алдарлыг эмчизи” хүндүлүг атты тывыскан.
“Тыва Республиканың мурнунга ачы-хавыяазы дээш” Тыва Республиканың медалы-биле: күш-культура болгаш спортту хөгжүдеринге ачы-хавыяазы, хөй чылдарда ак сеткилдиг ажылы дээш Таңды кожууннуң Спорт школазының директору Михаил Кара-оолович Оюнну база чылыдылга-энергетика комплекизин хөгжүдеринге ачы-хавыяазы база хөй чылдарда ак сеткилдиг ажылы дээш ЧЭК-4 БК Ак-Довурак участогунуң начальниги Александр Александрович Дубковту шаңнаан.
Хөй чылдарда ак сеткилдиг ажылы база социал адырны хөгжүдеринге улуг үлүг-хуузу дээш күш-ажылдың хоочуну Николай Бойдуевич Сарыгларны “Шылгараңгай күш-ажылы дээш” Тыва Республиканың медалы-биле шаңнаан.