Тывада эвээш орулгалыг өг-бүлелерге хамааржыр деп бадыткалы бар хөй ажы-төлдүг өг-бүлелер республика бюджединиң акша-хөреңгизи-биле бичии уругларынга эмнерни халас алыр. Республиканың чазаа чурттакчы чоннуң ол кезээн эм-таң-биле хандырарының чурумунга чогуур өскерилгелерни киирген.
ТР-ниң Кадык камгалал яамызының тайылбырлааны-биле алырга, ол ачы-дуза эмчиниң амбулаторлуг эмнээшкинге бижип берген эмнеринге хамааржыр. Оларны чиигелделиг эмнер садыындан рецепт-биле ап болур.
Оон аңгыда, республиканың эрге-чагыргазы ол-ла документи-биле хөй ажы-төлдүг өг-бүлелерге чуртталга-коммунал ачы-дуза чарыгдалдарынга чөпшээрээн үстүкү үлүгнү эвээжеткен. Амгы үеде ол бүгү хамаатыларның ниити өг-бүле орулгазының 22 хуузу болуп турар. Бир эвес өг-бүле хөйнү чарыгдаар болза, ол артык чарыгдалдарның хемчээлинге субсидия алыр эргелиг. Хөй ажы-төлдүг өг-бүлелерге ол деңнелди Тывада 15 хуу кылдыр тургускан.
51 муң ажыг уруг кижизиттинип турар хөй ажы-төлдүг 14615 өг-бүлелерге социал деткимчениң чаа хемчеглери онаажыр. Республика ону бодунуң орулгазындан төлээр. Ол сорулгаларга 2024 чылда бюджеттен немелде 7 млн. рубльди, 2025 чылда база дараазында чылдарда 27,7 млн-ни тускайлаар.