Чаа чыл бүдүүзүнде, Тыва Республиканың Чазааның бажыңынга, аңгы-аңгы адырларның хоочуннарынга ССРЭ-ниң составынче Тываның эки тура-биле киргениниң 80 чылынга тураскааткан юбилейлиг медальдарны тыпсыр байырлыг езулал болуп эрткен. Тыва Республиканың Баштыңы Владислав Ховалыг шаңналдарны тывыскан. Бөгүнгү хүндүткел дээрге хоочуннарның онзагай ачы-хавыяазы болгаш оларның кызымаккай күш-ажылы дээш өөрүп четтириишкинни илереткен мөгейиг-дир деп, ол демдеглээн.
Тыва Республикада 2024 чыл - регионга онза ужур-уткалыг юбилейлиг чыл кылдыр эртип турар.
«Бо болуушкун чүгле Тываның чоннуң амыдыралын үндезининден өскерткенинден аңгыда, Россияның хөй националдыг күрүне кылдыр тургустунганының бир чадазы болганын бистиң Президентивис Владимир Владимирович Путин демдеглээн. Тываның чурттакчылары бүгү чурт-биле кады шупту шенелделерни эрткен – дайзыннар-биле шериг удурланыышкынын, экономиканың болгаш социал адырның катап тургустунуушкунун болгаш хөгжүлдезин, рынок чаартылгаларының берге чылдарын» - деп, Владислав Ховалыг бодунуң илеткелинде демдеглээн.
Тываның Баштыңы Ада-чурттуң Улуг дайынының киржикчилериниң бөгүнгү салгалдары алдарлыг кырган-ачаларының чагыын сагып, тускай шериг операциязының үезинде эрес-дидим болгаш маадырлыг чоруун көргүзүп турарын онзалап демдеглээн.
Национал төлевилелдерни боттандырарынга идепкейлиг киржип, 2030 чылга чедир бот-тускайлаң хөгжүлде программазынга федералдыг деткимчени чоокта чаа алганы, республиканың экономиктиг хөгжүлдезинге болгаш чоннуң амыдыралын экижидеринге чаа идиг апаарын республиканың удуртукчузу демдеглээн.
Тываның Баштыңы бөгүн шаңнал алганнарның шуптузун Ада-чуртунга бараан болурунга берген хөй-хөй чылдары, күш-шыдалы, күчү-күжү, төрээн черинге ынакшылы каттыштырып турарын демдеглээн.
Регионнуң баштыңы бодунуң база дүүн чаа-ла телефон дамчыштыр чугаалашканы Россияның Президентизиниң өмүнээзинден шаңнал алганнарга болгаш Тыва Республиканың бүгү чурттакчыларынга кел чыдар Чаа чыл-биле байырны чедирген. «Кады оон-даа улуг чедиишкиннерни чедип алырывыска бүзүрээр мен!» - деп чугаалаан.
Тыва Республиканың социал-экономиктиг хөгжүлдезинге киирген үлүг-хуузу база хөй чылдарда ак сеткилдиг ажылы дээш дараазында хоочуннарны юбилейлиг медальдар-биле шаңнаан:
- «Орус географтыг ниитилел» бүгү-российжи хөй-ниити организациязының Тываның республика салбырының даргазы Кара-кыс Аракчааны;
- Тыва Республиканың Баштыңының чөвүлекчизи, күш-ажылдың хоочуну Александр Бегзини;
- дайынның, күш-ажылдың, чепсектиг күштерниң болгаш корум-чурум камгалаар органнарның бүгү-российжи хоочуннар (пенсионерлер) организациязының Тываның регионалдыг салбырының даргазы Сагаан-оол Долгарны;
- Тыва Республиканың күрүне ажылдакчылары, күш-ажылдың хоочуннары Алдын-оол Канзай, Дандар-оол Ооржак, Чимит-Доржу Ондар, Григорий Ширшин, Даваа-Самбуу Яндак, Хонук-оол Монгушту;
- Тыва Республиканың бирги президентизи Шериг-оол Ооржакты;
- социал адырның хоочуну Ольга Дамдынны;
- күрүнениң чер хайгааралы, чер тургузуунуң хоочуну Виктор Дандарны;
- көдээ ажыл-агыйының хоочуннары Дадар-оол Донгак, Олег Кызыл-оол, Маадыр Шывыкты;
- тус чер бот-башкарылга органнарының хоочуннары Александр Дронин, Владимир Евсеев, Светлана Созинованы;
- арга-арыг ажыл-агыйының хоочуну Владислав Канзайны;
- арга-арыг ажыл-агый адырында күш-ажылдың хоочуннары Сергей Сапелкин биле Андрей Попеляевти;
- күш-ажылдың хоочуннары Нина Сарыглар, Кошкар-оол Ондарны;
- өөредилге системазының хоочуннары Валентина Ондарны;
-дээди өөредилгениң хоочуну, Тывада ССРЭ-ниң хостуг хүрешке бирги спорт мастери Оргеллээр Ондарны;
- кадык камгалал системазының хоочуннары Алевтина Сиразитдинова, Роза Ширшинаны;
- спорттуң хоочуннары, Россияның ча адарынга алдарлыг тренерлери Евгений Тутатчиков биле Раиса Тутатчикованы;
- тыва телевидениениң хоочуну Дыдый Сотпаны;
- Тываның улустуң чогаалчызы, күш-ажылдың хоочуну Кара-Күске Чоодуну.