Бөгүн Кызылга Тываның ниити өөредилге албан черлериниң директорлары чаа школа автобустарының дүлгүүрлерин байырлыг байдалга хүлээп алган. Республиканың школа автопарыгынга немей келген 47 чаа «ПАЗ», «ГАЗ» база «УАЗ» автобустар Чаа чылдан эгелеп өөреникчилерни аай-дедир аргыштырып эгелээр.
Тываның Баштыңы Владислав Ховалыг школа удуртукчуларынга дүлгүүрлерни байырлыг байдалга тыпсып тура, Россияның Президентизи Владимир Путинниң деткиишкини-биле, федералдыг шиитпирлерни боттандырып, Тываның школаларының автопарктары тос дугаар чыл чаа автобустарны ап турарын сагындырган. Тываның школа автопарктары 2016 чылдан тура 284 чаа школа автобустарын алган, бөгүн 47 хөлге немешкени ол.
Көдээ черлерде, ооң иштинде хоорай чурттакчылыг черлерде, биче хоорайлар школаларында ажылдаар хуусаазы төнген, ол ышкаш байдалы бергедээн автобустарны солуур дээш, чаа автобустарны аңгылаан. Автобустарны чүгле уругларны школаже чедиреринге эвес, а школачыларның янзы-бүрү спортчу, культурлуг болгаш өске-даа хемчеглеринче, дыштаныр черлерже бөлүктер аайы-биле сөөртүрүнге ажыглаар. Тываның Баштыңы чаа транспортту алганы-биле удуртукчуларга байырны чедирип тура, ону ажыглаарда уругларның айыыл чок чоруун мурнады шиитпирлээрин айыткан:
«Тожу, Мөңгүн-Тайга кожууннар дээн ышкаш чедери берге черлерде школаларга күштүг автобустарны үндүрген. “Спутник” биле “Мөңгүн” микрорайоннарга удавас ажыттынар чаа школалар школа автобустарын база алыр. Регионга келген автомашиналар эң-не ыраккы суурлардан, суурлардан безин өөреникчилерге школаже орукту айыыл чок база таарымчалыг болдурар ужурлуг деп, база катап демдеглеп каайн» - деп, Тываның Баштыңы чугаалаан.
Аргыжылганың айыыл чок чоруун хандырар дээш автобустарны херек чүүлдер: тахографтар, дүргенин кызыгаарлаар дериг-херекселдер, чырыткылар, чолаачыны кыйгыртыр базыткыыштар, навигация херекселдери-биле дерээн. Өөредилге чериниң хереглелин көрүп, 24 олуттуг эң делгем ГАЗ автобустарны, 12, 15 база 20 олуттуг бичежек транспорттарны берген.
Тываның чүгле Бии-Хем биле Тере-Хөл кожууннар чаа машиналарга чагыг киирбээн, а арткан шупту муниципалдыг тургузугларның өөредилге черлери чаа автобустарны бөгүн алган. Кызылда «Тываның кадет корпузу» республиканың школа-интернады, Чадаана хоорайда үш школа база Шагаан-Арыгның ийи школазы “ГАЗ” маркалыг автобустарны алганнар.
Федералдыг төптүң деткимчези-биле республиканың школа автопарктарын чепсеглээри ам-даа уламчылаар деп, Тываның Баштыңы Владислав Ховалыг бодунуң блогунда дыңнаткан. Келир чылын 25 школа автобустарынга чагыгны белеткеп турар.