Владислав Ховалыг Тываның төп болгаш барыын кожууннарже үнүүшкүннерге ажылдаан. Одалга сезонунуң кайы-хире чоруп турарын хынаары-биле чылыдылга-энергетика комплекизиниң кол пунктуларынга ол четкен. Владислав Ховалыг Улуг-Хем база Чөөн-Хемчик кожууннарда чаа школалар тудугларынга база кандыг капиталдыг септелге ажылдары негеттинип турарын көөрү-биле Ак-Довурак школазынга барган. Ол объектилерге чорааш, Владислав Ховалыгга манавааны звонокту алган – Владимир Путин олче долгааш, республика Баштыңынга төрүттүнген хүнү-биле байырын чедирген.
Владислав Ховалыг Президент-биле телефон дамчыштыр чугаалажып тургаш, сентябрь 2-де Тывага келгениниң соонда шиитпирлээр дээн элээн каш чугула айтырыгларын сайгарып чугаалашканын дыңнаткан:
«Бөгүн сургакчылашкында чоруп турарымны Владимир Владимировичиге чугааладым. Мартта болган авария соонда катап тургустунган Шагаан-Арыгның котельнаязынга база катап чедип чордум. Ол чорааш, коммуналдыг чидиг айтырыывыс канчаар шиитпирлеттинип турарын көрдүм. Ак-Довурактың ЧЭТ-иниң байдалын база хайгаарап турар бис» - деп, Владислав Ховалыг илеткээш, Тывага чылда 2 хуу чиигелделиг ипотекаларны ажыглап ажылдаанын, транспорт төлевилелдерин, ылаңгыя республикада чаштарның хөй төрүттүнүп турары-биле социал инфраструктураны эде чаартыры чугула апарган ажылдарны чугаалаан.
«Күрүне баштыңының төрүттүнген хүнүм-биле байыр чедиреринге үезин аңгылап, кичээнгейи угландырганы дээш өөрүп тур мен - деп, Тываның Баштыңы Путин-биле чугаа соонда бодунуң блогунда бижээн. – Владимир Владимирович чанымда бо уругларга болгаш Тываның хөй националдыг бүгү чурттакчыларынга кел чыдар Чаа чыл-биле байыр чедирерин диледи! Ооң дилээн өөрүшкү-биле күүседип тур мен!»
Владислав Ховалыг Шагаан-Арыгда чаарттынган котельнаяның ажылын хынаан. ЧЭТ-ке септелгелиг катап тургузуушкун ажылдарының соонда, шупту чүве үрелиишкин чок ажылдап турарын боду көрген. Амгы үеде Шагаан-Арыгның котельнаязында 4 котел ажылап турар. Тываның Баштыңы дежурный смена-биле чугаалажырга, ооң ажылчыннары котельная хала чок ажылдап турарын бадыткаан. Шагаан-Арыгның социал объектилеринде чылыг чогуур чурумунда, котельнаяда хөмүр-даштың курлавыры четчир. Владислав Ховалыг чылыдылга төвүнүң ажылдакчыларынга Чаа чыл бүдүүзүнүң байырын чедирип, узун дыштаныр хүннер амыр-тайбың эрттирерин күзээн:
“Чаа чыл дээрге, бир дугаарында, кижи бүрүзүнге өг-бүлениң чылыг-чаагай байырлалы болур. Ынчангаш чаа 2025 чылды чаңгыс чер-чурттугларывыс чылыг-чымчак уткуур кылдыр бүгү күжениишкиннерни үндүрери чугула. Амгы үеде Шагаан-Арыгда чылыгны чүгле котельнаядан берип турар, ындыг-даа болза, бо чылдың март айда төп котельнаяга болган озал-ондактың уржуктарын чайладып тургаш тургускан көжүп чоруур биче котельнаялар хоорайның курлавырында арткан” – деп, Тываның Баштыңы хыналданың түңнелдерин бодунуң блогунда дыңнаткан.
Тываның Баштыңы бо чылдың март айда газтыг-доозун холумактыг частыышкын болган Шагаан-Арыгның ЧЭТ-ке чаа котельная тудары чугула апарганын Владимир Путинге дыңнатканын сагындыраал. РФ-тиң вице-премьери Марат Хуснуллин биле Россияның тудуг болгаш ЧКА сайыды Ирек Файзуллинниң ниити башкарылгазы-биле чоруткан Тываның Чазааның бүгү белеткел ажылдарының дугайында долу медээлерни Президент алган. Владимир Путин Росия Федерациязының Чазааның курлавыр фондузундан чаа котельная тудуунга акша-хөреңгини үндүрер дугайында Тываның дилээн деткиирин РФ-тиң Чазааның даргазының оралакчызынга дааскан.
Амгы үеде котельная тудуунга белеткел төнчү чадада келген: Россияның Тудуг болгаш Чуртталга-коммунал ажыл-агый яамылары чаа котельнаяның төлевилелин боттандырарының айтырыын кады шиитпирлеп, тудуг черин шилээн, төлевилел-санаашкыннары чоруп турар.