Бөгүн, декабрь 24-те, Тываның Национал хөгжүм-шии театрынга республиканың булуңнарындан салым-чаяанныг оолдар, уруглар - бичии спортчулар, самчылар, ыраажылар, хөгжүмчүлер, аңгы-аңгы фестивальдарның, конкурстарның болгаш олимпиадаларның тиилекчилери, тускай шериг операциязының киржикчилерниң ажы-төлү, хөй ажыөтөлдүг өг-бүлелерниң уруглары чыглып келген. Ынчалдыр республика Баштыңының Елказы республиканың кожуун, сумуларындан 1000 ажыг уругну чыыпкан.
Баштыңның Чаа чыл Елказынга келген республиканың 19 муниципалдыг тургузугларындан школачылар театр артистериниң тургусканы “Үш чүүл эртемниг оол” деп театржыткан оюн-тоглааны сонуургап көрген. Ыры-шоорлуг, танцы-самныг хөгжүмнүг солун көргүзүгнүң соонда, театрның ийиги каъдында фойеге “Ак адыгга аалдап четкеш” деп утренникке оолдар, уруглар киришкен.
Тываның Баштыңының Чаа чылдың байыр чедириишкинин Чазак даргазының оралакчызы Орлан Сарыглар дамчыткан. «Эртип турар чылда шупту эки өөренип, ада-иелериңерге, кырган-ава, кырган-ачаларыңарга дузалажып, кызымак чорууңарны көргүскен силер. Дыка берге даалгаларны күүседип, ону ажып эрте бергениңерге чоргаарланып тур бис. Бистиң республикавыстың келир үези силерге, мурнуңарда улуг оруктар болгаш амгы үениң технологиялары ажык. Кадыкшылды, өөредилгеге улуг чедиишкиннерни, чырык чаагай күзелдериңер бүдерин күзедим. Чаа чыл-биле, уруглар!» – деп, оралакчы дарга байыр чедириишкининде демдеглээн.
Чаа чыл байырлалының организаторлары оюннарлыг болгаш чогаадыкчы мөөрейлерлиг аңгы-аңгы шөлдерни белеткээн. Байырлалдың кол маадырлары – Соок-Ирей биле Харжыгаш Чаа чыл-биле уругларга байырны чедирген. Республика Баштыңының белеткээни чигирсиг белектер – уругларга эң-не өөрүнчүг сактыышкын бооп артары чугаажок.
Республиканың уруглар эмнелгезиниң эмчилери чаа чыл хемчээнге киржип келген уругларга халдывырлыг тыныш аарыгларын, ол ышкаш COVID-19-ту тарадып нептеретпес дээш, кадыкшыл байдалын хайгаараан.