Декабьның 21-де, Виктор Көк-оол аттыг национал театрга «Өскүс-оол. Сырын-хаттың тоожузу» деп бирги тыва мюзкилдиң баштайгы көргүзүү болуп эрткен. Мюзиклди Өскүс-оол дугайында тыва тоолдарга база эки болгаш багай, меге болгаш чөптүг чорук дугайында чүүлдерге үндезилеп тургускан. Ону чогаадырынга чүгле тус черниң артистери болгаш хөгжүмчүлери эвес, а чурттуң билдингир театрларының профессионалдары база киришкен.
Шииниң либреттозун Вилория Шожукпан, а хөөмей болгаш хип-хоп кирилделиг хөгжүмүн композиторлар Урана Хомушку биле Роман Чокуров олар бижээннер. Омскиниң күрүнениң хөгжүм театрының кол режиссеру, «Алдын Маска» национал театр фестивалының дипломантызы Александр Лебедев мюзиклди тургузуп режиссерлаан.
Тываның Баштыңы Владислав Ховалыг Чаа чылдың бо белээ дээш шуптузунга өөрүп четтиргенин илередип, мюзикл чүгле төрээн сценазынга эвес, а Россияда болгаш делегейде билдингир культура шөлдеринге улуг үнелелди алырынга бүзүрелин илереткен. Ол ышкаш «Күжүгет Шойгу» культура фондузунуң эгелээшкининиң ачызында бо онзагай болуушкун бүткен деп демдеглээн.
«Төрээн чери дээш улуг сагыш човаашкынның, чоннуң сүлде-сүзүк болгаш культурлуг өнчүзүн кадагалап, сайзырадыр дээш харыысалгалыг чоруктуң чижээ-дир» - деп, Владислав Ховалыг онзалап демдеглээн.
Тываның культура сайыды Виктор Чиггит премьера соонда парлалга-конференциязының үезинде, бистиң чурттуң шупту улуг театрлары болгаш чогаадыкчы бөлүктери киржип турар «Улуг гастроль» төлевилелче мюзиклди киирер айтырыгны яамы өөренип көөрүн планнап турарын дыңнаткан. «Красноярск крайдан база Санкт-Петербургтан бистиң мюзикливисти көргүзерин дилээн ийи чалалганы алдывыс. Ниитизи-биле алырга, кол сорулга чедип алдынган, ам мюзикливис сценага ам-даа артсын дээш ажылдаар херек» - деп, Виктор Чижит чугаалаан.
Төлевилел Күжүгет Шойгу Культура фондузунуң эгелээшкининиң ачызында, Тываның Культура яамызының деткимчези-биле боттанган дээрзин сагындыраал.