Декабрь 17-де эрткен республика Баштыңының чанында чоннар болгаш шажыннар аразында харылзаалар чөвүлелинге Кызыл Епархиязының төлээзи Иеромонах Амвросий (Громов) сөстү алган. Интернетке дыка багай медээлерниң дүвүрээзинниг салдарын көрген кижилер чүдүлге баштыңнарынга келгеш, сагыш-сеткилинге амыр-тайбыңны эгидип алырга дуза дилеп кээп турар деп, ол чугаалаан.
Православ хүрээниң өмүнээзинден Амвросий ада чурттакчы чон-биле ниити тайылбыр ажылынга киржиринге беленин илереткен. Ооң бодалы-биле алырга, мындыг байдалдарда алдар аттыг хөй-ниитилер болгаш хөй-ниити үзел-бодалын илередир лидерлер кижилерге шынны мегеден ылгап билиринге дузалажыр ужурлуг.
-Меңээ бир херээжен кижи келгеш: «Бо чүү болуп турары ол, Ачай?» деп чугаалаарга, база катап айтырдым: «Силерде бар медээлериңер шын деп бүзүрээр силер бе? Мону кайыын номчаан силер дээримге, элээн дөстерни адады. - Боданып көрүңер даан, оларга бүзүрээр-дир силер бе? Албан езузунуң медээлери бар, чазактың айтыышкыннары бар, аңаа даянып алгаш, түңнелдерни үндүрүп көрүңерем - деп, Амвросий ада чугаалаан. - Мындыг байдалдарда хүндүткелдиг удуртукчулар, алдар-аттыг кижилер, хөй-ниити организациялары, ооң иштинде шажын-чүдүлге черлери албан езузунуң медээлерин белеткээр парлалга албан черлеринге дузазын көргүзерин сүмелээр-дир мен. Медээлер килдизиниң удуртукчузу болганымда, мен аңаа белен болгаш ажык мен.