Россияның Дээди хамы Кара-оол Допчун-оол Тыва Республиканың Баштыңының чанында чоннар болгаш шажыннар аразында харылзаа талазы-биле чөвүлелге сөстү алгаш, Кызыл хоорайга болган болуушкунга бодунуң бодалын илереткен. Ооң бичии турда эш-өөрүнүң аразында, Сибирьни Ермактың эжелеп алганындан бээр маңаа өгбелери чурттап чораан орустар, украиннер, чуваштар, мордвалар дээш, өске нацияларның төлээлери барын сагынган. Амгы үеде Россияның дыка хөй регионнарында болгаш даштыкы чурттарда бо-ла таваржыр хам чүдүлгези кижилерни язы-сөөгүнүң аайы-биле аңгылашпайн чораан үелерде тыптып келгенин, ол ужур-чаңчыл ам-даа артып каанын чугаалаан.
Россияның Дээди хамы бурун шагдан укталган тыва хамнаашкынның кол чүүлдери язы-сөөгүнден болгаш шажын-чүдүлгезинден хамаарылга чокка кижилерге дуза кадып чоруур деп онзалап демдеглээн.
«Кажанда-даа кижилерни язы-сөөгүнден аңгылаваңар деп, каяа-даа кезээде чугаалап чоруур кижи мен. Чонну камнаар херек, кандыг-бир айтырыглар бар болза, ону шиитпирлээр. Хам чүдүлгези – чоннар аразында эп-найыралды тудуп чоруур бистиң өгбелеривистиң тайбың чүдүлгези-дир» – деп, демдеглээн.