Дээди Хуралдың өөредилге, культура, эртем болгаш национал политика талазы-биле комитеттиң даргазы Белекмаа Мунге даштыкы хамаатылар биле российжи күрүне органнарының аразында удур-дедир харылзааның эрге-хоойлу аспектилерин тайылбырлаан.
РФ-те даштыкы хамаатыларның эргелерин болгаш хүлээлгелерин “Россия Федерациязында даштыкы хамаатыларның эрге-хоойлу байдалының дугайында” федералдыг хоойлуда доктаатканын сагындырган. Мунге ол ышкаш федералдыг деңнелде миграцияга контроль хемчеглери күштелгенин база чугаалаан:
«Амгы үеде миграция айтырыын өйлеп таарыштырар хоойлу төлевилелин федералдыг деңнелде шалыпкын ажылдап турар, оларның чамдыызы 2025 чылдың январь 1-де күш кирер. Тываның Дээди Хуралы ол федералдыг хоойлу төлевилелдерин сайгарып көргеш, ында өскертилгелерни болгаш эдилгелерни деткип, чогуур харыыны чоруткан. 2019 чылда бистиң регионда аңаа хамаарышкан хоойлужудулга актызы хүлээп алдынган, күрүнениң национал политиказының хоойлужудулга болгаш организастыг хандырылга талазы-биле ажылдарын экижидер сорулга-биле, медээлер баазазын анализтээринге төлээлекчи органнарның база корум-чурум камгалаар блоктуң кады ажылдажылгазы чоруп турар» - деп, Белекмаа Мунге тайылбырлаан.
Даштыкы хамаатыларның социал болгаш культурлуг адаптациязының чугулазын депутат онзалап демдеглээш, хаар тудар ажылдарже күрүнениң, хөй-ниити организацияларының болгаш хамааты албан черлериниң кады ажылдажылга күжениишкиннерин негеп турарын демдеглээн. Ол ышкаш Националдар айтырыгларының талазы-биле агентилелдиң диаспораларны хөй-ниити болгаш экономиктиг амыдыралче хаара тудар эгелээшкинни деткип турарын, чурттуң хөгжүлдезинге оларның киирген үлүг-хуузунче хөй-ниитиниң кичээнгейин хаара тудары чугула деп демдеглээн.