Чоннар болгаш шажын-чүдүлгелер аразында харылзаалар талазы-биле чөвүлелдиң хуралында Тываның националдар херектериниң талазы-биле агентилелдиң удуртукчу албан-хүлээлгени күүседип турар Арслан Калзан республиканың социал-экономиктиг болгаш хөй-ниити амыдыралынче национал диаспораларны хаара тудар ажылды регионга күштелдирерин дыңнаткан. Республикада турум байдалды деткииринге ол чугула хемчег болур деп ол чугаалаан.
Национал каттыжыышкыннар төлээлери культурлуг, хөй-ниити эгелээшкиннеринде идепкейлиг киржип турарын демдеглээн.
- Тыва Республиканың девискээринде чурттап турар диаспоралар төлээлери бистиң регионнуң хөй-ниити болгаш культура амыдыралында доктаамал идепкейлиг киржип турар. Тускай шериг операциязының киржикчилеринге деткимче, Курск облазының чурттакчыларынга дуза – эң көскү чижектер ол. 2024 чылдың эгезинден ийи чартык миллион ажыг түңнүг акша дузазын көргүскеннер. Мында чылыг хеп аймаа, эм-таң, дериг-херекселдер дээш гуманитарлыг дуза кирбейн турар – деп, Арслан Калзан демдеглээн.