Декабрь 16-дан 20-ге чедир Тывада «Муниципалдыг тургузугнуң эң эки чаңгыс аай дежурный диспетчер албаны-2024» ат дээш регион чергелиг мөөрей болуп эртип турар. Чылдың-на эртип турар бо мөөрей муниципалдыг ЕДДС-тиң ажылын экижидеринге, оларның кайы хире үре-түңнелдиг ажылдап турарын үнелээринге, ажылдың чаа аргаларын кииреринге дузалаар.
Тываның хамааты камгалал болгаш онза байдалдар албанындан, Россияның ОБЯ-зының республика талазы-биле кол эргелелинден база регионнуң өске-даа яамылар болгаш ведомстволардан специалистер конкурс комиссиязынче кирип турар. Комиссия кежигүннери муниципалдыг тургузугларның берген документилерин өөренип көргеш, доктааткан критерийлер езугаар ЕДДС-тиң ажыл-чорудулгазын үнелээр.
Албан чериниң шупту негелделерге дүгжүп турарын, берген медээлерниң долузун болгаш шынарын, ол ышкаш отчеттуг үениң дургузунда ЕДДС ажылының түңнелдерин барымдаалап салган баллдар-биле тиилекчилерни тодарадыр. ЕДДС-тиң амгы үениң техниктиг чепсектери-биле дерээнин, видеоконференция системазының ажылын, профессионал кадрлар-биле четчелеттингенин, диспетчер кижиниң тургустунган байдалдарга шын хөделиринге белеткелин болгаш арга-шинээниң деңнелин, Россияның ОБЯ кризистиг байдалдарда башкарылга төвү болгаш өске-даа дүрген хөделир төптер-биле медээ солчулгазын организастаанының шынарын дээш, оон-даа өске чүүлдерни кичээнгейге алыр.
Тыва Республиканың онза байдалдарны болдурбас база оларны чайладырының талазы-биле чаңгыс аай күрүне системазының иштинде девискээр системазының 2024 чылда ажылдаанының түңнелдери-биле тиилекчилерни болгаш призерларны шаңнаар.