Бөгүн Тываның Чазаанга «Күзелдер шивизи» деп бүгү-российжи акцияның байырлыг ажыдыышкыны болуп эрткен. Тыва Республиканың “Баштайгыларның шимчээшкини” уруглар болгаш аныяктарның бүгү-российжи хөй-ниити-күрүне шимчээшкининиң регионалдыг салбырының кежигүннери республикада акция эгелээнин чарлаан.
Чазактың аппарат хуралы төне бээри билек, Тываның Баштыңы Владислав Ховалыг база чазак кежигүннери холлда саазын ойнаарактар-биле каастааш, республиканың уругларының күзелдерин бижээн шивижигешке чедип келген. Тываның Баштыңы үш шарны дүжүрүп алырга, ында беш харлыг Давааның, тос харлыг Элионораның болгаш чеди харлыг Тэнзинниң күзелдерин бижээн болган.
«Шагаан-Арыгдан Тэнзинниң күзели бүттүнгүр. Ол Кызыл хоорайдан «ДримТим» футбол клуву-биле ужуражыксап турарын тайылбырлап бижээн – деп, Владислав Ховалыг оолдуң күзелин ыыткыр номчаан. - А Кызылдан Даваа биле Элионораның оон арай нарын. Олар тывызыксыг белектер манап турарлар. Онзагай боорда, ажыктыг болгаш сактып артып каар белектерни бергени эки деп бодап тур мен».
Тываның Баштыңының соонда, республика Чазааның кежигүннери өске уругларның күзелдерин шивиден дүжүрген: колдуунда уруглар бир-ле онзагай белектерни дилээн, а ону бээр улус катаптаттынмас белектер манаан чаштарны канчаар өөртүрүн боданыр, ынчангаш оларның сонуургалдарын билип алыры чугула. Тодаргай күзелдерин бижээн уруглар база бар. Чижээ, 12 харлыг Айдаш аътка эзер дилээрге, Тываның Чазааның Даргазының оралакчызы Айдыс Сынаа ол ыяап-ла күүсеттинер деп аазаан. Ооң Шагаан-Арыгдан Айлуна электрилиг гитара дилээн, а кадык камгалал сайыды Анатолий Югай ону канчаар дүрген боттандырарын боданып эгелээнин чугаалаан.
«Күзелдер шивизи» төлевилел уругларның Чаа чыл күзелдерин боттандырыптар күштүг. Күзелдиг кижи бүрүзү ёлкажеланий.рф сайтыга бүрүткеткеш, Соок-Ирей бооп болур. Улуг улус уругларның күзелдерин бижээн бирээ шарны тырттып алгаш, Чаа чылдың тоолчургу күзелин боттандырар.
Баштайгыларның шимчээшкини «Күзелдер шивизи» акция ноябрь 15-те эгелээн. Акция 2025 чылдың февраль 28-ке чедир уламчылаар. 2018 чылдан бээр бүгү чуртта эртип турар акция буянныг чүүл кылыксаан кижилерни чылдың-на хаара тудуп турар. Алды катап эрткен акцияның организаторлары болгаш киржикчилери 210 муң ажыг уругларның чаа чыл күзелдерин боттандырган. Күрүне албан черлери база компаниялар төлээлеринден эгелээш хуу сайгарлыкчылар дээш, муң ажыг буянныг кижилер чылдың-на ачы-буянныг үүледе киржип турар. Россияның Президентизи Владимир Путинниң чылдың-на Чаа чылдың акциязынга каттыжып кээри чаңчыл апарган.
Акцияга киржир дизе, ёлкажеланий.рф сайтыга «мечтатель» азы «исполнитель» кылдыр бүрүткедир. Акция күзелдерни үш хевирге чарган: материалдыг (номнар, сонуургаан барааннары, спортчу херекселдер, идик-хеп), материалдыг эвес (кандыг-бир мергежилге бодун шенээри, аян-чорук, солун улус-биле ужуражылгалар) база уругнуң сонуургалы-биле сюрприз белектерни бээри.
Акцияга 3 хардан 17 харга чедир назылыг уруглар киржир: кадыкшылы кызыгаарлыг уруглар, эвээш орулгалыг өг-бүлелерден уруглар, тускай шериг операциязының киржикчилериниң ажы-төлү, өскүс болгаш ада-иезиниң хайгааралы чок арткан уруглар.
Ол ышкаш Донецк база Луганск Улус Республикаларның, Запорожье база Херсон областарның девискээринде чурттап база бүрүткеткен уруглар, Белгород, Курск база Брянск областарда доктаамал чурттап турар, азы чурттап турар черлерин күш-биле каггаш чоруткан азы когараан өг-бүлелерден уругларның күзелдерин боттандырар.