Тывада өөредилге инфраструктуразының комплекстиг чаартылгазын чорудар улуг ажылдар уламчылавышаан. Тываның Баштыңы регионнуң төлевилелдерин федералдыг төпке камгалап, республиканың өөредилге яамызының күжениишкиннериниң база эки белеткелиниң ачызында, бо чылын “Өөредилге” национал төлевилел шугуму-биле аңгы-аңгы хемчеглерниң боттаныышкынынче регион беш млрд ажыг федералдыг акша-хөреңгини хаара туткан.
«Амгы үениң школазы» регионалдыг төлевилел-биле республиканың өөредилге организацияларының материал-техниктиг баазазы чаартынып, «Өзүлдениң точкалары» база кванториумнар ажыттынган, чаа школалар тудуу уламчылап, башкылар материалдыг деткимчени алган.
Ниити өөредилгениң кол программалары-биле таарыштырган өөредилге ажыл-чорудулгазын чорудуп турар организацияларны дериг-херекселдер болгаш оран-сава-биле хандырарынче 78 хире млн рубльди аңгылаан. Он муниципалдыг тургузугларда «Өзүлде точказының» 16 төвүн, Кызыл хоорайның 2 биле 8 дугаар школаларында үрде манааны кванториумнар ажыттынган.
Көдээ черлерде өөредилгени бедидер деп шиитпирлээн башкыларга 13 млн. рубльди төлеп берген: конкурс шилилгезинге тиилээн башкы бүрүзү чаңгыс катап төлээр компенсацияны алган. Төлевилелдиң киржикчи бүрүзүнге төлевирниң түңү бир миллион рубль болган.
Кызылдың Вавилин ээтпээнде 825 база Танды кожууннуң Балгазын суурда 616 олуттуг амгы үениң чаа школалары өөреникчилеринге эжиктерин ажыткан. Чыл төнчүзүнге чедир 825 олуттуг 4 улуг школа тудуу доостур: Каа-Хем суурда база Таңдының Бай-Хаакта, Мөңгүн биле Спутник микрорайоннарда. Ам бо школалар өөредилге ажыл-чорудулгазын чурумчудар документилерин ап, өөренир өрээлдерин белеткээр. Чадаана хоорайда 616 олуттуг база Мөңгүн-Тайга кожууннуң Кызыл-Хая суурда 176 олуттуг школа тудуу ам-даа чоруп турар.
Тываның өөредилге сайыды Ренат Ооржактың чугаазы-биле алырга, амгы үениң өөредилге стандарттарының негелделеринге дүүштүр туттунган шупту школалар уругларның өөрениринге эң-не таарымчалыг. 2022 чылдан бээр Тывада 46 өөредилге организацияларынга капиталдыг септелгени чорутканын сагындырып, бо чоокку үеде Бии-Хем кожууннуң Туран хоорайга 825 олуттуг улуг школа тудуу эгелээрин дыңнаткан.
«Инфраструктураның чаагайжыдылгазы шапкын темп-биле чоруп турар, чоокку үеде өөредилгениң шынары элээн экижиир ужурлуг. Бо бүгү ажылдарның кол сорулгазы – өөредилгениң деңнелин бедидери. Ажы-төлүвүс шылгалдаларны эки дужаап, билдингир дээди өөредилге черлеринче кирип алзын дээш» - деп, Ренат Ооржак демдеглээн.
«Уруг бүрүзүнүң чедиишкини» регионалдыг төлевилел-биле 48 млн ажыг рубльге 13 ниити өөредилге организацияларында спорт залдарын септеп, ажык калбак шөлдүг спортчу объектилерни дериг-херекселдер-биле дерээн. Кадыкшылы кызыгаарлыг уругларның 10 дугаар школазының Черби суурда салбыры, Сукпак суурда аграрлыг интернеат-лицеи, Кызыл хоорайның 3, 8 база 11 дугаарлыг школаларының 5 спорт шөлдеринге капитал септелгени чоруткан. Кызыл, Туран, Сыстыг-Хем школаларында база Улуг-Хемниң аграрлыг школа-интернадының чанында 8 спортчу клубту ажыткан.
«Аныяк профессионалдар» регион төлевилели-биле аңгылаан 20 ажыг млн рубль-биле Тываның тудуг техникумунуң баазазынга дүрген профессионал белеткел төвүн ажыдып, ооң ажылын хандырар. Ажылчыннарны белеткээр база оларның профессионал өзүлдезинге бот-тускайлаң курузун ажыдарының талазы-биле бүдүрүлгелерниң дилээн көрүп, өөредилге программаларын боттандырар.