Декабрь 14-те Краснопресненскийниң эрик кыдыында “Россия” национал төпке “Чаңгыс демниг Россия” партиязының XXII улуг чыыжы болуп эрткен. Тываның төлээлерин регионнуң удуртукчузу, партияның регионалдыг салбырының секретары Владислав Ховалыг баштаан. База төлээлерниң аразынга партияның Бай-Тайга кожууннуң тус чер салбырының күүсекчи секретары Маяна Сонай, Дээди Хуралдың (парламент) айыыл чок чорук болгаш корум-чурум талазы-биле комитет даргазы Аяс Санчат, Кызыл хоорайның Төлээлекчилер хуралының Баштыңының оралакчызы Аяс Лопсан, Кызыл кожууннуң Төлээлекчилер хуралының депутады, 55-ки гвардейжи мото-адыгжы бригаданың старшиназы Байлак Ондар, Бии-Хем кожууннуң Хадың суурнуң Төлээлекчилер хуралының депутады Артыш Байкара олар бактааган.
Шуулганның кол темазы – фронтуга бүгү таланың дузаламчызын көргүзер, тускай шериг операциязының киржикчилерин болгаш оларның өг-бүлелерин база чаа регионнарны деткиири. База ол ышкаш “Чаңгыс демниг Россия” 2025-2026 чылдарда сорулгаларын тодарадып, улусчу программага өскерилгелер киирип, эге салбырларның дугайында дүрүмнү хүлээп алган.
Пленарлыг хуралга Россия Федерациязының Президентизи Владимир Путин илеткелди кылган. “Тускай шериг операциязының чорудуп эгелээн баштайгы хүнүнден тура “Чаңгыс демниг Россия” дайынчыларга деткимчени көргүзүп, бистиң маадырларывыска, оларның өг-бүлелеринге чугула хоойлу-дүрүм системазынга эгелекчи саналдарны киирип, социал магадылалды үндүрүп, хосталган регионнарны катап тургузуп, тайбың чурттакчыларга бүгү дузаламчыны чыып, дайынчы зонадан чанып келген хоочуннарга хамааты мергежилди чедип алырынга болгаш ниитилел, политиктиг амыдыралынга дузаны кадып турар бис” – деп, чурттуң Баштыңы демдеглээн.
“Бистиң Президентивистиң илеткели ханы ужур-уткалыг. Чурттуң удуртукчузунуң салган сорулгаларын күүседир бис” – деп, Владислав Ховалыг бодунуң сагыш-сеткилин үлешкен. Тываның Чазаа, чону ТШО-нуң киржикчилерин, хоочуннарын болгаш оларның өг-бүлелерин деткип турар. Каш хонук бурунгаар, декабрь 13-те республиканың бүгү тус чер чагыргаларның киржилгези-биле чыгган ээлчеглиг чүъктү аъткарып чорутканын демдеглээн.
“Тиилелге бистиң болур. База бир кол чүүл бистиң оолдарывыс чидириг чокка тайбың амыдыралче эглип келири, оларны ажыл-агый-биле хандырары, оларның шалың төлевири чогуур деңнелге турары, эртем-билиг чедип алырынга, бодунуң хууда ажыл-херээн ажыдып алырынга дузаны кадары болур” – деп, Тываның Баштыңы демдеглээн. 2026 чылда партия парламент соңгулдаларынга белеткенир. “Парламент соңгулдарынга чедир көңгүс эвээш үе арткан, белеткел ажылын эгелээр бис” – деп, ол түңнээн.
Бөгүн “Чаңгыс демниг Россия” бистиң чурттуң политиктиг күштериниң башкарыкчы болгаш күштүг партиязы болур. Партия ажы-төлдүг өг-бүлелерни деткииринге, бистиң үндезин чурттакчыларывысты кадагалаарынга, өзүп-көвүдээринге, өг-бүлениң чаңчыл болган үнелиг чүүлдеринге аныяктарны кижизидеринге, күрүнениң политиказының кол сорулгаларын шиитпирлээринге идепкейлиг киржип турар.