Тывада республика болгаш муниципалитеттер башкарылгазында театр, концерт база культура-дыштанылга албан черлеринче халас кирер эргени тускай шериг операциязының киржикчилеринге болгаш оларның өг-бүлелеринге берген. «Ада-чурт камгалакчылары» фондунуң Тывада салбырының ооң мурнунда үндүрген эгелээшкинин республиканың Чазааның 2024 чылдың декабрь 12-де чарлыы-биле деткип, ачы-дузаны албан езузу-биле бадыткаан.
Ам Тываның Чазаа муниципалдыг чагыргаларга культура албан черлериниң планнааны театржыткан, концерттиг болгаш өске-даа өөредиглиг-хөглээшкинниг хемчеглериниң кайызынга-даа тодаргай санныг олуттарны аңгылап каарын албан езузу-биле хүлээткен. “Ада-чурт камгалакчылары” фондунуң салбыры тускайлаан олуттарны ажыглаарын харыылап, ТШО киржикчилериниң болгаш оларның өг-бүле кежигүннериниң ук хемчеглерже кээрин организастаарын бодунга хүлээнип алган.
Культура адыры – ТШО киржикчилеринге болгаш оларның өг-бүлелеринге саң-хөөге хамаарышпас деткимчениң шак ындыг хевири тургустунган чаңгыс чер эвес. Спортчу объектилер, музейлер болгаш библиотекаларже баары, ТШО киржикчилериниң өг-бүлелеринден школачыларны уругларның дыштанылга лагерьлеринче путевкалар-биле мурнады хандырары, республиканың санаторий-профилакторийлеринге дыштанылга база юридиктиг дуза чедирилгези дээш, өске-даа халас ачы-дузалар бар. Оон аңгыда, ТШО-нуң киржикчилериниң ажы-төлүн уруглар садтарынче болгаш школаларже киирерде, хамааты байдал актыларын бүрүткедирде ачы-дузаны мурнады алыр эргелиг.