Сибирь федералдыг округда Россияның Президентизиниң бүрүн эргелиг төлээзи бодунуң байыр чедириишкининде күрүне тургузуунуң кол принциптерин быжыглаарынга Россия Федерациязының Үндезин хоойлузунуң ролюн демдеглээн.
Анатолий Серышевтиң бодалы-биле алырга, Россияның Конституциязы дээрге, чазактың шупту адырларының болгаш деңнелдериниң, хамааты ниитилелдиң база чурттуң хамааты бүрүзүнүң Россияның чаагай чоруу дээш кады ажылдаарының быжыг эрге-хоойлу үндезини-дир. «Ылаңгыя амгы үеде, кажан российжи күрүне хөгжүүрүнүң бот-тускайлаң оруунга эргезин шиитпирлиг камгалап турда, ол онза чугула» - деп, бүрүн эргелиг төлээ демдеглээн.
Россияның Президентизи Борис Ельцинниң 1993 чылда үндүрген чарлыы-биле, чылдың-на декабрь 12-де демдеглеп турарывыс Конституция хүнүн чуртка улуг ужур-уткалыг документиге тураскаадып тургускан. Россияның шупту регионнарынга бо хүн эртип турар патриотчу хемчеглер бистиң күрүнениң төөгүзүнге болгаш ооң хоойлуларынга хүндүткелди аныяк-өскенге угаадырынга дузалаар. Бо хүн аныяк улуска паспорттар тыпсыр чаңчыл болу берген байырлыг езулал - Россияның бүрүн эргелиг хамаатызы болганын база чуртунуң келир үези дээш долу харыысалгалыг апарганын бадыткап турар.