Бөгүн – Россия Федерациязының Конституциязының хүнү. Тываның Баштыңының Владислав Ховалыг күрүне байырлалы-биле республиканың чурттакчыларынга байырны чедирген.
Байыр чедириишкининде, чуртта болгаш делегейде болуп турар өскерлиишкиннерниң негелделеринге дүгжүр кылдыр хоойлужудулганы сайзыраңгайжыткан Конституция бистиң чуртувустуң чурттакчы бүрүзүнге эргелериниң болгаш хостуг чоруунуң магадылалы, турум чоруктуң болгаш эртенги хүнге бүзүрелдиң демдээ апарганын демдеглээн.
«Бөгүн, бистиң чуртувус хостуг сайзыраар арга дээш демисежип турда, бистиң маадырларывыстың – Ада-чурт камгалакчыларының, национал бот-догуннаашкынывыстың болгаш девискээривистиң бүдүн-бүрүн чоруунуң камгалакчыларының эрес-дидим чоруун онза сеткил-биле алдаржыдып турар бис. Улуг төөгүлүг, бүзүрелдиг амгы үелиг болгаш чечектелген келир үелиг күштүг болгаш хамаарышпас чуртта чурттап чоруурувуска чоргаарланыр бис!» - деп, Владислав Ховалыг хууда блогунда бижээн.
2004 чылга чедир Конституция хүнү ажылдавас хүн турганын сагындыраал. 2004 чылдың декабрь 29-туң РФ-тиң Күш-ажыл кодекизиниң 112 дугаарлыг чүүлүнче киирген эдилге-биле, 2005 чылдың январь 1-ден эгелеп база катап ажыл хүнү апарган. Россияның байырлал хүннериниң даңзызынче 2005 чылдың июль 21-де Россия Федерациязының Конституция хүнү кирген.
Байырлал бүдүүзүнде, РФ-тиң Президентизи Кремльге дээди күрүне шаңналдарын болгаш премияларны тыпсыры чаңчыл апарган. Шупту регионнарда база Тывада өөредилге болгаш культура организациялары эрге-хоойлу кичээлдерин, темалыг таныштырылгаларны болгаш делгелгелерни, патриотчу концерттерни эрттирип турар.