Бөгүн Тываның Чазаның бажыңынга, Тыва Республиканың Чазааның Даргазының оралакчызы Айдың Чюдюктуң удуртулгазы-биле Тыва Республикада сепаратисчи, националисчи хөөннүг кыжаныышкыннарның, массалыг үймээннер болгаш экстремисчи угланыышкынныг кем-херек үүлгедиишкиннериниң тыптып база тараарын болдурбас болгаш аңаа удур дүрген хөделир республика штавының хуралы болуп эрткен.
Сайгарган темаларның бирээзи – информастыг шөлде хоойлуга удур парлаан чүүлдерниң тараарын болдурбас айтырыг болган. Сөөлгү айларда социал четкилерниң тыва пабликтеринде чоннар аразында көөр чок чорукту хөөткен экстремисчи угланыышкынныг чүүлдер парлаттынганы демдеглеттинген.
Барыын чүк чурттарының чурттуң иштинде политиктиг байдалды божаңнадыр дээн массалыг халдаашкыны-биле чорудуп турары ажылында Россияга удур шак бо мындыг темага парлаан чүүлдер үнүп турар дээрзин штабтың киржикчилери демдеглээн. Ынчангаш республиканың чурттакчылары информастыг ажык шөлде боттарының хөделиишкиннеринге онза кичээнгейлиг болуп, күткүүшкүннүг материалдарга алыспазы чугула дээрзин сагындырган.
Оон аңгыда социал четкилерге база кандыг-бир социал арыннарга кижиниң эр-кызынга, язы-сөөгүнге, нациязынга, дылынга, аңгы-ызыгуурунга, шажын чүдүлгезинге хамаарыштыр көөр хөөн чок чорукту оттурган чүүлдерни парлап үндүрер болза, Россия Федерациязының Кеземче хоойлузунуң "Көөр хөөн чок чорукту азы адаан-өжээнни оттурганы, база кижиниң мөзү-бүдүжүн куду көргени дээш" деп 282 дугаар чүүлге онаажып, кеземче херээнге онаажып болурун сагындырып тур.