Россияның Президентизиниң Сибирь федералдыг округда бүрүн эргелиг төлээзи Анатолий Серышевтиң «Күзелдер Шивизи» ачы-буян акциязында киржири чаагай чаңчыл апарган. Ол округтуң регионнарында бичии сибирьжилерниң ыдык күзелин күүседир. Уруглар ойнаар-кыстар, чаа чылдың хөгжүмнүг дүрзүлерин база интерактивтиг ойнаарактарны чагып турарлар. Ажыктыг күзелээшкиннер аразында элезин-биле чуруттунарынга чырык стол, хаактаарынга белеткел станогу, эштир бассейнге кичээлдээр абонемент бар. Оолдар оон аңгыда аквапаркче баарын, поезд машинизи болурун, мунар ыттар-биле селгүүстээрин дилээннер. Ол күзелдер шупту албан бүдер!
Россияның Президентизи Владимир Путинниң инициативазы-биле 2018 чылда «Күзелдер Шивизи» акция эгелээн. Күзелдерни боттандырар дээш чаа чылдың хуулгаазынын күүседир дээн улусту ол каттыштырган. Амыдыралдың берге байдалынга таварышкан, өскүс болгаш хөй ажы-төлдүг өг-бүлелерден уруглар, кадыкшылы кызыгаарлыг, 3-тен 17 хар чедир назылыг уруглар акцияга киржип болур. Тускай шериг операциязында киржип турар шериг албынныгларның, Луганск улус республика, Донецк улус республика, Запорожье болгаш Херсон областарда чурттап турар ажы-төлче онза кичээнгейни углаан. Алды чыл дургузунда акция 213 муң ажыг уругнуң күзелдерин боттандырган.
Эрткен чылын Анатолий Серышев Сибирьден база Луганск Улус Республикадан он үш уругнуң күзелин күүсеткен. Эрткен чылда сес аныяк сибирьжилер бүрүн эргелиг төлээден Чаа чылдың хуулгаазын белээн алган.