Декабрь 9-та Кызылда Тиилелге шөлүнге Ада-чурт Маадырларының хүнүнге тураскааткан байырлыг митинг болуп эрткен. Ада-чурттуң Улуг дайынының үезинде тулчуушкунга бажын салган дайынчыларның тураскаалында Мөңге отту кывыскан. Тываның хөй-ниити төлээлери тураскаалга чечектерни салгаш, амы-тынындан чарылган маадырларның сактыышкын минутазын кылган.
Декабрь 9-та бүгү Россияга тулчуушкун үезинде маадырлыг болгаш эрес-дидим чоруун көргүскен дайынчыларга мөгейип сактып турар. 1769 чылдың ол хүнүнде орус императрица Екатерина II Ыдыктыг Тиилекчи Георгий орденин тургускан төөгүлүг болушкунга тураскаадып ол хүннү доктааткан. Дайынчы эрес-дидим чоруу-биле онзаланган шериг албанныг кижилерге ол шаңналды тыпсыр. Амгы үеде, декабрьның 9-та Совет Эвилелиниң Маадырлары, Ыдыктыг Георгий болгаш Алдар орденнериниң кавалерлери, Социалистиг Күш-ажылдың Маадырлары, Россия Федерациязының Маадырлары деп аттарның эдилекчилеринге хүндүткелди көргүзер.
Дараазында шупту салгалдар оларның маадырлыг үлегер-чижектеринге кижизиттинип турар. Бөгүнгү митингиге бүгү-ле салгалдарның маадырларының аттарын сагындырган. Тыва маадырлыг эрес-дидим эрлерниң аразында салым-чаяанныг болгаш билдингир шериг баштыңчызы Сүбедейниң ады чоргаар дыңналып чоруур. Артында күчүлүг ук-салгалы чок, бөдүүн өг-бүледен үнген тыва маадыр шериг депшилгениң бүгү чадаларын эрткеш, кайгамчык бедиктерни чедип ап, төөгүге бодунуң изин арттырып каан.
Ада-чурттуң Улуг дайынының үезинде 11600 ажыг кижи Совет Эвилелиниң Маадыры деп атка төлептиг болган, а тайбың үеде – 1600 кижи. Тыва Арат Республикадан Маадырның Алдын Сылдызын Михаил Бухтуев, Түлүш Кечил-оол, Хомушку Чургуй-оол, Николай Макаренко, Александр Семирацкий, Василий Брагин, Дмитрий Комарицын, Николай Кабак, Леонид Ефимов, Василий Полес болгаш Николай Трофимов олар алган.
Тускай шериг операциязының чылдарында бистиң үениң эрес-дидим дайынчыларының чаа аттары дыңналып келген, олар чүгле дайынчы операциялар үезинде маадырлыг чорукту болгаш эрес-дидим чорукту көргүскен эвес, а тулчуушкуннарга тактиктиг шиитпирлерни үлегер-чижектиг күүседири-биле ылгалып, дайынчы эштериниң амы-тынын камгалап, дайзын күштерин базып, дайынчы даалгаларны шиитпирлиг күүсеткеннер. Бистиң алдарлыг чаңгыс чер-чурттуувус Сергей Шойгунуң соонда Россияның Маадырлары деп атты тывысканнарның аразында тускай шериг операциязының хоочуннары Мерген Донгак, Чалым Чүлдүм-оол база Буян Куулар бар.
Хөй-ниитиниң, аныяктарның, Тываның Чазааның, Дээди Хуралдың, республиканың камгалал күштериниң төлээлери чыглып келгеш, эрткен болгаш амгы үениң Маадырларның алдар-адын сактып, Ада-чурттуң Улуг дайынының үезинде тулчуушкунга өлген шериглерниң тураскаалының чанынга салютту адып, боодал чечектерни салган.