Тускай шериг операциязының зоназында Тывадан шериг албанныгларга дээш бо чылдың сөөлгү кышкы гуманитарлыг ачы-дуза чүъгүн хевирлээр кампания республикада доозулган. Гуманитарлыг ачы-дуза чүъгүн хевирлээр кампания доозулган. Тыва Республиканың Чазаа «Бүгү чүвени Тиилелге дээш!» деп федералдыг төлевилел-биле кампанияны чорудуп турар.
Улусчу фронтунуң регионалдыг күүсекчи комитединиң дыңнатканы-биле алырга, чыышка регионнуң 18 муниципалдыг тургузуглары, ол ышкаш найысылал Кызыл хоорай киришкен. Бүгү республикада чүс ажыг волонтер төптери чондан болгаш организациялардан посылкаларны хүлээп алган. Тожу кожуундан сөөлгү машина төп чыылда пунктузунга чүъүгүн дүжүрген: Тываның чедери берге булуңнарының бирээзиниң чурттакчылары үш инектиң коң эъдин, чылыг идик-хептерни, ол ышкаш тус черниң эки турачыларының холу-биле кылган продукциязын белеткээн.
Бо удаада Кызыл хоорайның мэриязы сайгарлыкчылар Оксана Сергеева, Артыш Давакай база Римма Семис-оол олар-биле кады тускай шериг кезээниң дайынчыларының адрестиг дилээ-биле чүъктү белеткээн. Ында үжен хире янзы-бүрү дериг-херекселдер, тудуг болгаш септелге херекселдери, чарыгдал материалдары, аяк-сава, газ баллоннары дээш, оон-даа өске херек чүүлдер бар.
Республиканың школачылары кышкы кампанияга идепкейлиг киришкеннер. «Уруглар навигаторлары» төлевилелдиң Тывада регионалдыг координатору Сергей Лопсанның дыңнатканы-биле алырга, 50 муң ажыг өөреникчи аңаа үлүүн киирген. Ниитизи-биле оолдар он муң хире янзы-бүрү барааннарны чыгган, оларның аразында чылыг хептер, хаактаар костюмнар, бензин-биле ажылдаар шимчедикчилер, чылыг үрдүрер херекселдер, он-он саазын хааржактарда хууда арыг-силиг херекселдери, консервалар, эмнер, оңгуга ажыглаар лаалар, камгалалдар бар. Чаа чыл бүдүүзүнде уруглар дайынчыларга чаагай күзээшкиннерлиг 1000 ажыг чагааны бижээн.
Бо хүнге чедир республика 2,6 тонна хой, инек болгаш сарлык эъдин, 9 мотоциклди, 10 генераторну, 20 кургаг фенни, 133 чаштынар четкилерни, ол ышкаш хөй санныг чылыг идик-хепти, барааннарны болгаш фронтуда шериглерге херек янзы-бүрү техника аймаан болгаш дериг-херекселдерни белеткээн.
Гуманитарлыг ачы-дузаның кышкы чыылдазы декабрь 10-га чедир уламчылаарын сагындырып тур бис. Чаа чыл таварыштыр фронтуже посылка чорудар күзелдиг кижилер дараазында адреске хүлээдип болур: Кызыл хоорай, Тыва эки турачылар кудумчузу, бажың 3, телефону: 8 (39422) 2-10-50.
Декабрь 13-те Кызылдан 20 тонна чүъктүг машина Луганск Улус Республиканың Свердловск хоорайже үнүптер. Гуманитарлыг ачы-дуза чүъгү кажан, каяа чеде бээрин дыңнадып, айыттынган хүнүнде дайынчылар чедирилге пунктузунга чеде бээрлер деп, Улусчу фронтунуң регионалдыг күүсекчи комитеди тайылбырлаан.