Тываның Баштыңы Владислав Ховалыг республиканың удуртулгазының болгаш хөй националдыг чонунуң өмүнээзинден кожа регион – Красноярск крайның чурттакчыларынга база ооң губернатору Михаил Котюковка Россия Федерациязында эң улуг субъектизиниң тургустунганындан бээр 90 чыл ою-биле байырны чедирген.
«Бо төөгүлүг хүнде Сибирьниң алдарлыг эрткен болгаш амгы үезинге чоргааралывысты, келир үеже бүзүреливисти каттыштырып турар. Бистиң республиканың чурттакчыларынга Красноярск край - чурттуң өске-даа хөй регионнарынче агаар болгаш демир-орук хаалгазы, студент аныяктарның хоорайы, солун мергежилди чедип алыры болгаш хууда тургустунуушкунуң чери болуп келген болгаш артпышаан» - деп, байыр чедириишкиннеринде бижээн.
Владислав Ховалыг Тыва Республика биле Красноярск крайны кижилерниң ниити салым-чолу, үр үе дургузунда эп-найыралы, эртем болгаш чогаадыкчы харылзаазы доңнаан деп онзалап демдеглээн. А регионнарның экономиктиг, инвестициялыг болгаш турисчи арга-шинээн каттыштырган улуг хемчээлдиг төлевилелдер Сибирьниң чечектелиишкини-биле холбашкан дыка хөй айтырыгларны шиитпирлээринге бурунгаарлаарынга арганы бээр дээрзинге, Тываның Баштыңы бүзүрелдиг.
Регион төвү - Красноярск хоорайга эрттирип турар юбилейдиг хемчегде, бистиң республикавыстың мурнундан - Тываның Баштыңының инвестицияларны хаара тудар, регионнар аразында болгаш делегей чергелиг кады ажылдажылга талазы-биле тускай төлээзи Владимир Донских биле Тываның Дээди Хуралының (парламентизиниң) Даргазының оралакчызы Андрей Листков олар киришкен.
Красноярск край таптыг-ла 90 чыл бурунгаар, 1934 чылдың декабрь 7-де үндезилеттинген. Ол хүнде чаа субъектини тургузарының дугайында РСФСР-ниң бүгү-российжи төп күүсекчи комитединиң президиумунуң доктаалы үнген. Эгезинде аңаа 31 район, Хакас автономнуг область, Таймыр болгаш Эвенки национал округтар кирген, Красноярск хоорай ооң административтиг төвү апарган. Ол үеде регионнуң чурттакчы чону 1,7 млн. кижи турган. Сөөлгү чылдарда регионнуң административтиг-территориалдыг девискээри чаңгыс эвес катап өскерлип келген: районнар тургустунуп, узуткаттынып, чурттакчылыг черлерниң эрге-байдалын өскерткен. Ам Красноярск крайже 13 хоорайлар, 3 хааглыг административтиг-территориалдыг тургузуглар, 41 район база 3 округ кирип турар.
Регион ам-даа өзүп, сайзырап турар. Ооң чурттакчы чону амгы үеде 2,8 млн. кижиден ажа берген, ооң шөлү 2,4 млн хире дөрбелчин километр, чурттуң девискээриниң 14 хире хуузун ээлеп турар.
Регион бойдус курлавырлары-биле байлак. 2024 чылдың көргүзүү-биле алырга, регионда 188 үлетпүр бүдүрүлгелери ажылдап турар. Мында улуг металлургия комплекизи тургустунган: Красноярскиниң ГЭС – Красноярскиниң ак-демир комбинады – Ачинскиниң дой-довурак комбинады – Красноярскиниң металлургия заводу. “Норильскиниң никели” деп өңнүг металлдарны казып, болбаазырадыр компаниялар бөлүү Россияда никель тывыжының 80 хире хуузун, кобальттың 75 хуузун база платинаның 90 ажыг хуузун бүдүрүп турар.