Кузбасска “Өг-бүле бирги черде: социал өскүс чорукка удур дээштиг профилактика системазы” деп округ форуму болуп эрткен
Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышевтиң даалгазы-биле ооң оралакчызы Александр Орехов, бөгүн Кузбасска болуп эрткен «Өг-бүле бирги черде: социал өскүс чорукка удур дээштиг профилактика системазы” деп округ форумунга киришкен.
Күрүне баштыңының даалгазы-биле Россия Федерациязының Президентизиниң уруглар эргелериниң талазы-биле бүрүн эргелиг төлээ Мария Львова-Белова социал өскүс чорукка удур профилактика системазынга бүгү-российжи инспекциялар чорудуу-биле, округ форумнары болуп эртип турар. Специалистер регионнарда социал өскүстерге хамаарыштыр профилактиктиг ажылдарынга демдекти берип, күрүне албан черлеринде уруглар санын кызырар база өг-бүлени камгалап арттырынче угланган эки ажылдарны өөренип көрген.
Россияның Президентизи Владимир Путин 2024 чылды Өг-бүле чылы кылдыр чарлаанын Александр Орехов демдеглээн. Өг-бүле – российжи күрүнениң чөлеңгиижи болгаш ниитилелдиң өзээн тургускан дээди үнелел деп, күрүне баштыңы чаңгыс эвес катап демдеглээн.
Бүрүн эргелиг төлээниң оралакчызының чугаазы-биле алырга, социал өскүс чоруктуң чылдагааннарынга профилактика, ооң иштинде өг-бүле бүрүзүнге болгаш уруг бүрүзүнге бот-тускайлаң хамаарылга, үезинде деткимчени болгаш дузаны көргүзери онза ужур-дузалыг. Регионнарда уругнуң эргелерин камгалаар бүрүн эргелиг төлээлер регионнарның эрге-чагырга органнарының, тус чер чагыргаларының, корум-чурум камгалаар органнарның демниг күжениишкиннери кады бо айтырыгларны шиитпирлээринге онза рольду ойнап турар.
Бүрүн эргелиг төлээниң оралакчызы социал адырда эки турачыларның болгаш социал угланыышкынныг коммерцияга хамаарышпас организацияларга четтиргенин илереткен. Сибирь регионнарында 1,4 муң хире КХО-лар социал өскүс чорукка удур профилактика системазын эде тургузар, өскүс болгаш ада-иезинңи хайгааралы чок арткан уругларны үдээриниң дээштиг аргалрын тывар айтырыглар-биле ажылдап турар.
Өске чугула угланыышкыннарның аразында суд ниитилели-биле ажылдаары база бар. Александр Орехов, бүрүн эргелиг албан чери ада-ие эргелерин кызыгаарлаарынга хамаарышкан шиитпирлерни хүлээп алырда, кичээнгейге алыр ужурлуг чаа чүүлдерни суд ниитилелинге дамчыдар дээш, харылзакчы кылдыр ажылдаарынга белен деп чугаалаан.
«Анаа олурган ажыы чок. Бистиң ниити сорулгавыс – социал өскүс чорук-биле демисежир, ажы-төл өг-бүлеге өзүп, кижизиттинер кылдыр бүгү-ле хемчеглерни алыр» - деп, бүрүн эргелиг төлээниң оралакчызы чугаалаан.
Сибирь федералдыг округ регионнарының федералдыг болгаш регионалдыг эксперттери, күүсекчи эрге-чагырга органнарының төлээлери, социал өскүс чорукка удур профилактиктиг система албан черлериниң дуртукчулары дээш, 200 ажыг кижи форумнуң ажылынга киришкен. Социал өскүс чорукка удур профилактиктиг чугула айтырыглар, амыдыралдың берге байдалынга таварышкан өг-бүлелерни деткиири, ведомстволар аразында кады ажылдажылга кол темалар болган.