Декабрьның 5-те Россияда Эки турачының (волонтёрнуң) хүнүн демдеглеп турар. Россияда волонтерлар шимчээшкининиң хөгжүлдезиниң узун төөгүзү-биле холбаалыг байырлалды Россия Федерациязының Президентизиниң Чарлыы-биле 2017 чылда доктааткан. 1985 чылда КНО-нуң Чиңгине Ассамблеязының шиитпири-биле тургустунган экономиктиг болгаш социалдыг хөгжүлде дээш демдеглеп турары хүнде Бүгү-делегейниң эки турачылар хүнүн база эрттирип турар.
Тываның Баштыңы Владислав Ховалыг республиканың эки турачыларынга байырны чедирген. Республика чурттакчыларындан дуза дилээн кижилерге ачы-дузазын көргүзеринге белен улус кайы хөй. Делегейни экижидер сорулгалыг эки турачы шимчээшкин бөгүн аңгы-аңгы назы-харлыг, мергежилдиг болгаш нациялыг кижилерни каттыштырып турар. Олар янзы-бүрү хөй-ниити организацияларының хайгааралы-биле пенсионерлерни хайгаарап, уругларга дузалажып, аңгы-аңгы хемчээлдиг культурлуг болгаш спортчу хемчеглерни эдертип, хөй санныг хемчеглерге киржип турарлар.
Тускай шериг операциязы эгелээнден бээр фронтуда дайынчы даалгаларны күүседип турар тыва шериг албанныгларны болгаш оларның өг-бүлелерин деткиир ниити ажылга тыва эки турачы организациялары идепкейлиг киржип турар. Волонтер кижи бүрүзү-ле гуманитарлыг ачы-дузага боттарының үлүг-хуузун киирери - ооң хүлээлгези деп санап чоруур.
“Мурнуку одуругда шериг оолдарывыска республиканың чурттакчыларындан чылыг идик-хептер, чуруктар, ус-шевер кылыглар, чагаалар болгаш открыткаларны алыры – улуг өөрүшкү” – деп, Владислав Ховалыг демдеглээн.
Тываның Баштыңы кызымаккай күш-ажылы дээш шупту волонтерларга өөрүп четтиргенин илереткен. «Үе-шагын, күжүн, сагыш-сеткилин харамнанмайн, чаңгыс чер-чурттугларынга, төрээн чуртунга халас дузалажып чоруур, буянныг үүле-херектер амыдыралының овур-хевири апарган кижи бүрүзү бо хүннү бодунуң байырлалы деп санап болур-дур» — деп, регионнуң удуртукчузу демдеглээн.
Бөгүн Тывада "Тываның энерелдиг чүректери", "Эмчи-волонтёрлар", "Тиилелгениң волонтёры", "Мээң найысылалым", “Баштайгыларның шимчээшкини” Россияның уруглар болгаш аныяктар шимчээшкининиң регионалдыг салбыры дээш, өске-даа эки турачы организациялар идепкейлиг ажылдап турар. Президент Владимир Путинниң тургускан стратегтиг сорулгалары-биле шимчээшкинниң моон соңгааргы хөгжүлдезиниң курузун хевирлээн - 2030 чылга чедир чуртта аныяктар аразында волонтер болгаш хөй-ниити организацияларының кежигүннериниң үлүү 45 хуу ажар ужурлуг. Амгы үеде эки турачыларның эгелээшкиннерин деткиир, чаа организацияларны ажыдар болгаш волонтер шимчээшкининче аныяктарны хаара тудар хемчеглерни эрттирер сорулганы эрге-чагырганың мурнунга салган.
Эки турачының хүнүнде респубикага ийи улуг хемчег болуп эрткен: Тываның Аныяктар херектериниң талазы-биле яамы «Доброфорум-2024» өөредиглиг форумну база «Улусчу фронтунуң» регионалдыг штавы «Шупту чүвени Тиилелге дээш» патриотчу шуулганны организастап эрттирген.