Бөгүн Владислав Ховалыг Россияның федералдыг айыыл чок албанының Тыва Республикада эргелелиниң удуртукчузунда чаа томуйлаткан Максим Викторович Бережок-биле ужурашкан. Россия Федерациязының федералдыг айыыл чок албанының директорунуң дужаалы-биле ол албан-дужаалда ону томуйлаан болгаш, бөгүн Тыва Республиканың Баштыңынга болгаш территориалдыг айыыл чок органының хууда составынга таныштырган.
"Максим Викторович 1994 чылдан бээр айыыл чок органнарында ажылдап турар. Ажылында улуг арга-дуржулгалыг. Тывага томуйладыр мурнунда, Россияның федералдыг айыыл чок албанының төп аппарадынга ажылдап турган" – деп, Владислав Ховалыг федералдыг ведомствонуң чаа удуртукчузу-биле ужурашкан соонда, бодунуң блогунда бижээн.
Россияның Президентизиниң Чарлыы-биле, Россияның федералдыг айыыл чок албанының Тыва Республикада эргелелин 2021 чылдан тура удуртуп турган Владлен Мельниковту чурттуң өске регионунда улуг шериг албан-дужаалче шилчиткени билдинген. Тываның Баштыңы Мельниковка билчилгелиг кады ажылдажылгазы болгаш республикага кем-херек үүлгедиишкиннерин чавырылдырарынга ведомстволар аразының демниг хөделиишкининге үлүг-хуузун кииргени дээш, четтиргенин илереткен.