40 харлыг Азиат Каң-оолович Чанзан Тываның Баштыңының чарлыы-биле хамааты камгалал болгаш онза байдалдар талазы-биле регионалдыг албанның удуртукчузуда томуйлаткан.
Азиат Чанзан – Москваның «Синергия» деп саң-хөө-үлетпүр университединге “юриспруденция” мергежилди чедип алган. Тускай ортумак эртемни чедип алгаш, 2005 чылдан 2024 чылдың майга чедир Тыва Республиканың Иштики херектер яамызының одуруунга албан ажылын эрттирген. 2018 чылдан Россияның ИХЯ-зының Кызыл хоорайда полицияның патруль-пост албанының аңгы ротазының командиринге ажылдаан. Бо чылын полицияның майору эргелиг халажылгаже үнген.
Республиканың корум-чурум камгалаар органнарынга албан эрттирип турган үезинде, 2009, 2013, 2023 чылдарда Соңгу Кавказка терроризмге удур операцияларга киришкен. Ол «Дайынчы кады ажылдажылга дээш», «Соңгу Кавказка дайынчы хөделиишкиннер киржикчизи», «Терроризмге удур операцияларның киржикчизи», «Иштики херектер яамызының дайынчы хемчеглер киржикчизи», «Дайынчы шылгарал дээш», «Дайын хөделиишкиннериниң хоочуну», «Соңгу Кавказка албан-хүлээлгези дээш», III болгаш II чадаларның «Ажыл-албанынга шылгарал дээш», онза ачы-хавыяазы-биле шылгараан шериг албанныгларга тыпсыр «Георгий крестиниң 200 чылы» дээш тураскаал медальдың эдилекчизи.
Тыва Республиканың хамааты камгалал болгаш онза байдалдар албанынга Азиат Чанзанны томуйлаарының мурнунда, ук албанны тускай шериг операциязының хоочуну, ТШО үезинде дайынчы даалгаларны күүседирде эрес-дидим болгаш коргуш чок чоруун көргүскени дээш «Эрес-дидим чорук дээш» медальдың эдилекчизи Евгений Овсянников 2017 чылдан бээр удуртуп турганын сагындыраал. Амгы үеде Овсянников Тываның Кызыл кожууннуң чагырга даргазының хүлээлгезин күүседип турар.