Бо хемчеглер кадыкшылы кызыгаарлыг кижилерниң чидиг айтырыгларынче кичээнгейни хаара тудуп, ниитилелдиң көрүжүн оларның дугайында үзел-бодалды өскертиринче угландырган. РФ-тиң Пенсия болгаш социал камгаладылга фондузунуң Тывада салбырының медээзи-биле алырга, республикада 23241 инвалид кижи бар, ооң иштинде 2629 кижи - 18 хар четпээн уруглар.
Республикада инвалидтерге шаптык чок шимчээшкинни болгаш чаа байдалдарга чаңчыгыышкын объектилерин тударынче угланган “Чедингир хүрээлел” күрүне программазы чедиишкинниг боттанып турар. Республиканың 103 социал-культурлуг объектилерин инвалидтерге болгаш шимчей албас улустуң негелделеринге таарыштыр дерээн.
Оон аңгыда Күш-ажыл болгаш социал политика яамызы программа күүселдези-биле чылдың-на чамдык инвалидтерни болгаш инвалид ажы-төлдүг өг-бүлелерни болгаш дайынчы хөделиишкиннер хоочуннарын чурттаар оран-сава-биле хандырып турар. Сөөлгү үш чылда 111 кижиниң чуртталга байдалын экижиткен. Амгы үеде реестрде 197 хамааты бар, оларның 186-зы инвалид, 11-зи - дайынчы хөделиишкиннер хоочуннары. 2024 чылдың декабрь 1-де чурттаар оран-сава садып азы тудуп алыры-биле чаңгыс катап алыр акша төлевирин 5 инвалид кижилер алган.
Инвалидтер декадазы-биле «Сүбедей» спорт комплекизинге хол-буду шимчевес инвалидтерниң республика чергелиг спартакиадазы эгелээн. Оон аңгыда “Кадыкшылы кызыгаарлыг болгаш инвалид уругларның эргелери болгаш ачы-дузазы” деп темага “төгерик стол” болуп турар. Декабрь 5-те кадыы кошкак уругларга баштайгы дуза чедирилгезинге “төгерик стол” болгаш өске-даа хемчеглерни планнаан.
Республиканың эмнелге болгаш социал төптеринде хемчеглер декабрь ортан үезинге чедир уламчылаар.