Тываның Баштыңы Владислав Ховалыг бистиң республикавысты төлептиг төлээлээн болгаш чаа билиглерниң долу чүъгү-биле чүгленип, Россияның өске регионнарындан эш-өөрнү тып, солун кылдыр дыштанган уругларның чуруун бодунуң блогунда парлаан.
Россияның Президентизи Владимир Путин бистиң республикага кээп чорда, «Чугула чүүлдер дугайында чугаалар» деп ажык кичээлге киришкен, Тывадан 35 школачыларның «Артек» делегейниң уруглар төвүнге дыштанылгазы доозуп турар. Россияның өөредилге сайыды Сергей Кравцовтуң чалааны-биле уруглар 2024 чылдың ноябрь 13-тен декабрь 3-ке чедир сураглыг төпте дыштанып турарын сагындыраал.
Артекте «Бистиң шилип алган оруктарывыс» деп кыйгырыг-биле чоруп турар 13-кү тускай угланыышкынныг сменаже тыва школачылар кирген. Уругларны аңгы-аңгы бөлүктерже чарып, башкылар оларга 21 хонук дургузунда делгереңгей программаны белеткээн. Школачылар бо неделялар дургузунда янзы-бүрү ажылдарга боттарын шенеп, керамика, авиамоделирование, ус-дааранылга, флористика дээш, оон-даа өске уруглар студияларынга мастерлерниң рольдарын шенеп көргеннер. Уруглар культурлуг экскурсияларга, походтарга киржип, солун кижилер-биле ужуражып танышканнар. Кежээниң-не эртип турар культура-маасалыг чыыштарны сонуурганнар.
«Шилип алган оруктарывыс» деп дыштанылга ээлчээ уругларның амыдыралынга уттундурбас кылдыр артып каар дээрзинге бүзүрээр мен» - деп, Владислав Ховалыг бодунуң блогунда уругларның идепкейлиг дыштанылгазының солун чуруктарын парлаан. Тыва школачыларга бо болуушкун шынап-ла улуг төөгүлүг. Россияның Өөредилге яамызы Кызылдың 20 дугаар школазынга Билиглер хүнүнде чурттуң Президентизи Владимир Путинниң эрттиргени «Чугула чүүлдер дугайында чугаа» деп кичээлдиң киржикчилеринге путевкаларны берген. Шупту оолдар бо төөгүлүг болуушкунну эрттирбейн, дыштаныр черинге эки чеде бээр кылдыр, оларның дыштаныр черинче оруунуң өртээн төлеп берген. Элээн каш уругларның ада-иелери оларга ындыг дузаны чедирер дугайында дилегни республика баштыңынче киирген соонда, Тываның Баштыңы Владислав Ховалыг ооң дугайында айтыышкынны берген.
Тывадан салым-чаяанныг школачылар, хөй ажы-төлдүг өг-бүлелерниң база тускай шериг операциязының киржикчилериниң уруглары дээш, 25 уруг “Артектиң” ол-ла сменазынга дыштанып турган.
Тывага 2023/24 өөредилге чылы күрүне баштыңының киржилгези-биле эгелээн. Владимир Путинниң эрттиргени ажык кичээл үезинде өөреникчилер ТШО киржикчилерин деткииринден эгелээш, Президентиниң ажыл графиги, туризмниң хөгжүлдези, уругларның дыштанылга лагерьлерин тудары болгаш школага даштыкы дылдар өөредилгезинге чедир, янзы-бүрү темаларны сонуургаан.
«Өөредилге» национал төлевилел күүселдези-биле туттунган 825 олуттуг 20 дугаар школага бирги кичээл - Президентиниң «Чугула чүүлдер дугайында чугаа» деп бирги кичээли болган. Хоорайның хемниң оң талакы кезээ - Вавилин ээтпээ микрорайонда школаны бо чылын ажыткан. Чаа школаның ажыттынганы - хоорайның өске школаларынга өөренип турганнар дээш, шупту 1300 ажыг школачыларга бажыңынга чоок черге шынарлыг өөредилгени алыр арганы берген.