Тускай шериг операциязының дайынчыларынга дээш республиканың муниципалдыг тургузугларында чыгдынган гуманитарлыг чүъктү бо хүннерде республиканың найысылалы Кызылга чедирип турар. Тыва Республиканың Чазаа «Бүгү чүвени Тиилелге дээш!» федералдыг төлевилелдиң кышкы ачы-дуза чыылдазын удуртуп турар.
Улусчу фронтунуң регионалдыг күүсекчи комитединиң даргазы Саима Далчинниң дыңнатканы-биле алырга, муниципалитеттерниң хөй кезии бо хүнге чедир тускай шериг операциязының зоназынче чорудар чүъгүнүң хүлээткен. Бир ай бурунгаар чарлаан кампания муниципалдыг чыылда пунктуларынга ажылдаан. Бадылаан график-биле Кызылче чедирилгени планнаан. Пятницада элээн каш муниципалдыг тургузуглар: Кызыл, Таңды, Мөңгүн-Тайга, Тере-Хөл, Тес-Хем кожууннар болгаш Ак-Довурак хоорай чүъгүн фронтуже дамчыткан. Неделя эгезинде Бай-Тайга, Барыын-Хемчик, Чөөн-Хемчик, Сүт-Хөл, Каа-Хем, Улуг-Хем, Чаа-Хөл, Чеди-Хөл, Өвүр, Эрзин база Бии-Хем кожууннардан машиналар гуманитарлыг чүъгүн хүлээткен.
Республиканың коллективтери болгаш организациялары база чурттакчы чону шериг албанныгларывыска кыжын херек чүүлдерни, 8 мотоциклди, 20 чылыг үрдүрер херекселдерни болгаш кургаг феннерни, 12 генераторларны, өске-даа техниктиг дериг-херекселдерни, чылыг хептерлиг болгаш аъш-чемниг посылкаларны ниити күжениишкиннерни-биле чыгган. Волонтерлар 130 чаштынар четкилерни өрүп, хүлээткен. Чүгле хой, инек болгаш сарлык эъдинден 2,5 тонна чъүктү чыгган.
Гуманитарлыг ачы-дуза чыылдазы декабрь 10-га чедир уламчылаар, баштайгы чүъктү Луганск Улус Республиканың Свердловск хоорайынга декабрь 13-те чедирери планнаттынган. Буянныг үүлеге киржиксээн Тываның чурттакчылары аңаа ам-даа киржип болур. Фронтуже посылканы Улусчу фронтунуң регионалдыг күүсекчи комитединиң бо адрезинче: Тыва эки турачылар кудумчузу, 3 («Норзин» СБ) азы Ленин кудумчузунда 5 дугаар бажыңда, ТывКУ-да «Бис кады бис» деп волонтерлар штавынга дамчыдып болур. Харылзажыр телефону: 2-10-50.
Тывада СВО киржикчилеринге болгаш оларның өг-бүлелеринге деткимчениң аңгы-аңгы хевирлеринче 2025 чылда республика бюджединде 800 хире млн. рубльди тускайлаан. Регионнуң саң-хөө сайыды Орлан Достай республика парламентизиниң сессиязынга бюджет төлевилелин таныштырып тура, ооң дугайында дыңнаткан.