Тыва Республиканың аныяктар херектериниң сайыды Субудай Оюн келир чылын эгелээр «Аныяктар болгаш уруглар» национал төлевилел боттаныышкыны-биле регионнуң эрге-чагыргазының мурнунда сорулгаларын таныштырган. Россияның Президентизи Владимир Путинниң эгелээшкини-биле эгелээн чаа национал төлевилелди Москвага регионалдыг күүсекчи эрге-чагырга органнарының удуртукчуларының улуг хемчээлдиг семинар-хуралында чугаалашкан.
“Аңгы-аңгы хар-назылыг бөлүктер-биле ажылдаан мурнакчы арга-дуржулганы быжыглаары-биле уругларны болгаш аныяктарны деткиир шупту хемчеглерни Россияның Президентизиниң эгелээни «Аныяктар болгаш уруглар» национал төлевилелче каттыштырар - деп, Субудай Оюн демдеглээн. – Национал төлевилелдиң шугуму-биле ол адырда аңгы-аңгы ведомстволарның ажыл-чорудулгазын дүүштүрер 9 федералдыг төлевилел бар. Аңгы-аңгы назы-харлыг уругларга болгаш аныяктарга – школачылардан эгелээш, студентилерге болгаш ажылчын аныяктарга чедир бо төлевилелди үре-түңнелдиг боттандырар сорулгалыг күүсекчи эрге-чагырганың харыысалгалыг органнарының чаңгыс командазын чыгган».
Национал төлевилелдиң көргүзүглерин чедип алырынга Аныяктар херектериниң талазы-биле федералдыг агентилелди, Тыва Республиканың Аныяктар херектериниң талазы-биле яамызын харыысалгалыг органнар кылдыр, а Тываның өөредилге яамызын кады ажылдаар кылдыр томуйлаанын сайыт тайылбырлаан.
Ведомстволар-биле кады инфраструктураны хөгжүдер, тудуг болгаш ниити өөредилге черлерин чаартыр, эртемниң, амгы үениң технологиялар адырында кадрларны школадан эгелеп белеткээр, регионалдыг аныяктар политиказын комплекстиг хөгжүдер, аныяк специалистерни деткиир, волонтерлар ажылын сайзырадыр болгаш өске-даа ажылдарны боттандырар.
Национал төлевилел күүселдези-биле Россияның аныяк хамаатыларынга деткимчени школага, колледжке азы дээди өөредилге черинге өөренип турда, күш-ажылчы баштайгы базымнарының-даа үезинде көргүзер. Ынчалдыр «Аныяктар болгаш уруглар» национал төлевилел аныяктарның политиказын элээн делгемчидип, Россияның бүгү талалыг хөгжүлдезиниң чугула кезээ апаар.
Субудай Оюн ооң-биле чергелештир, 2030 чылга чедир төрээн чуртунда бот-сайгартынар аргаларга бүзүрээр аныяктарның үлүү 85 хуу чедерин демдеглээн. Ону чедип алырда, аныяктарга грант деткимчезин көргүзер. Тывага ажыттынар грант дөзевилээриниң школазы “Аныяктар болгаш уруглар” национал төлевилелдиң көргүзүглерин чедип алыр хемчеглерни боттандырарының планы-биле ажылдаар. Школаның специалистери республиканың аныяктарынга боттарының идеяларын төлевилелдер кылдыр “хаптаарынга” база ол дээш грант деткимчезин алырынга өөредир. Тываның «Кады бис» регионалдыг штавының удуртукчузу Артыш Монгуш база "Тываның энерелдиг чүректери" командазы аныяктар ортузунга волонтер шимчээшкинин чорударынга чедиишкинниг арга-дуржулгазын көргүскен үре-түңнелдиг ажылының ачызында бистиң республика бүгү Россияда эки ажылдыг штабтар даңзызының үшкү одуруун ээлеп турарын сайыт демдеглээн.