Ноябрьның 27-де, Тываның Чазаанга «2025 чылда база планныг 2026 болгаш 2027 чылдарда республика бюджединиң дугайында» хоойлу төлевилелинге ажык дыңнаашкыннар болуп эрткен. Ук хемчегге Чазак кежигүннери, Дээди Хурал депутаттары, муниципалтетерниң болгаш хөй-ниитии организацияларының төлээлери киришкен.
Дээди Хуралдың даргазы Каң-оол Даваа дыңнаашкыннарны ажыдып тура, эрге-чагырга биле ниитилелдиң бюджет төлевилелиниң ажык дыңнаашкыннары шиитпирлер хүлээр ажылды ажык-чарлыг болдурганын демдеглээн. Чазак даргазының оралакчызы Уран-оол Ондар 2025 чылда бюджеттиң чарыгдалдарынче угланган планнаашкыннарны тодаргай тайылбырлап, республика бюджеди социал угланыышкынныг хевээр артканын айтып, ында тускай шериг операциязын деткииринче угланган хемчеглер база киргенин демдеглээн.
Экономиктиг сайзырал сайыдының албан хүлээлгезин күүседип турар Снежана Ховалыг келир үеде инвестиция төлевилелдерин боттандырганындан үлетпүр бүдүрүлгези көдүрлүрүн, 34 млрд рубль чедир инвестиция хемчээли көвүдээрин, 2027 чылга чедир каттышкан регионалдыг продуктунуң хемчээли 23,3 хуу өзүп, 152,4 млрд рубль чедерин илеткээн.
Республиканың саң-хөө сайыды Орлан Достай 2024 чылдың төнчүзүнде каттышкан регионалдыг продуктунуң хемчээли 124 хире млрд рубль чедип, эрткен чылдың деңнелинден 4,7 хуу өзүлделиг болурун дыңнаткан. Тыва Республиканың социал-экономиктиг хөгжүлдезиниң тускай программазының күүселдезин 2025-2030 чылдарда акшаландырып, үлетпүр, көдээ ажыл-агый, туризм, сайгарлыкчы чорук адырында төлевилелдерни аңгы-аңгы аргалар-биле деткииринге 6 млрд рубль түңнүг акша федералдыг бюджеттен тускайлаттынар.
2025 чылда республиканың каттышкан бюджединиң үндүрүг база үндүрүгге хамаарышпас орулгалары 2024 чылга деңнээрге 28 хуу хөй болуп, 18862 млн рубль чедер. Президентиниң Чарлыы езугаар национал сорулгаларның күүселдези - 2030-2036 чылдарда мурнады боттандырар угланыышкын бооп артар.
Дыңнаашкынның киржикчилери хамаатыларның үзел-бодалын өөренип көөрү чугула деп демдеглеп, айтырыгларны идепкейлиг салган. Авиабилеттер субсидияларынга база оруктарның капитал септелгезинге хамаарыштыр 28 айтырыг Дээди Хуралче кирген.
Бюджет төлевилелиниң дугайында долу информацияны Тыва Республиканың Чазааның база Дээди Хуралдың албан езузунуң сайтыларында салган. Чугула социал программалар болгаш инициативаларның акшаландырыышкынын хандырар бюджеттиң дугайында төнчү шиитпирни бо чоокку хүннерде хүлээп алыр.