Эрткен өрт айыылының сезонунда Тывага 44,8 муң гектар ниити шөлдүг 207 өрт бүрүткеттинген, эрткен чылга деңнээрге 12 катап хөй. Ноябрьның 25-те республика Баштыңы Владислав Ховалыгның эрттиргени аппарат хуралында 2024 чылда арга-арыг өрттери-биле демиселдиң түңнелдерин үндүрген.
ТР-ниң Арга-арыг болгаш бойдус ажыглалының илеткелинде медээлерден алырга, өөскээн 10 өрттүң-не 8-зи чаңнык дүшкенинден хып үнген. 207 өрттүң 145-жи чүгле ужуп чедер девискээрлерге болган.
Черге чоруур транспорттуң чедип шыдавазындан база ырак болганындан өрттерни өжүрери нарыыдап, аар уржуктарга чедирген. Өрттерниң көвей кезии бирги хүнүнде өжүртүнмейн барганындан, арга-арыгның хөй шөлүн эжелээн. Өрттүң чедирген когаралы – 1 млрд. 64,9 млн. рубль болган (2023 чылда – 44,8 млн.).
Республикага барык чеди ай үргүлчүлээн өрт сезону эң бедик класстың айыылы-биле эрткен. Тываның Чазаа үш катап регионалдыг онза байдал чурумун киирген. Ол ышкаш алды кожууннуң – Таңды, Каа-Хем, Тожу, Кызыл, Чеди-Хөл база Чөөн-Хемчиктиң девискээринге чурумну шыңгыыраткан.
Республика Баштыңы арга-арыг өрттериниң байдалын чавырылдырар дээш Россияның база регионнарның ОБЯ-зының күштеринден дузаны дилээн. Тывада өрттерни өжүржүр дугуржулга езугаар суг чаштырар БЕ-200 база МИ-26 агаар судноларын, «Тува авиа» база «Борус» (Красноярск край) авиакомпанияларның Ан-2 дөрт самоледун, «Тува» компанияның Ми-8 вертоледун хаара туткан.
Сибирьниң алды региону - Красноярск край, Бурят, Хакас Республикалар, Томск, Иркутск база Новосибирск областар Тываның девискээринде арга-арыг өрттерин өжүржүр кылдыр шупту 261 кижилиг десантыны чоруткан. Чурттакчылыг черлерге, көдээ ажыл-агыйынга база экономика объектилеринге дорт айыылды тургуспайн, демниг күжениишкиннер-биле өрттер өжүртүнген.
Яамының специалистери кижилерниң хайындан үнген өрттер саны эвээжээнин демдеглеп, 2024 чылда 207 өрттүң чүгле 15-жи болганын айыткан. Өрттерге хамаарыштыр херектерни оттуруп, истелгени чорудуп турза-даа, кымның буруузу-биле ооң хыпканы билдинмейн артып каап турар.
Тываның Баштыңы илеткел соонда, амдан эгелеп арга-арыг өрттеринге удур профилактика хемчеглеринче онза кичээнгейни углап, келир сезонга белеткелди эгелээр даалганы берген.
Владислав Ховалыг арга-арыг өрттери-биле демиселге киришкен шупту кижилерге коргуш чок чоруун база бедик мергежилдиин көргүскени дээш четтиргенин база катап илереткен. Оларның санында авиа-арга-арыг камгалалының ажылдакчылары, муниципалдыг тургузуглар баштыңнары, волонтерлар болгаш өске регионнардан дузалакчылар бар.