Тываның Баштыңы Ак-Суг чыдынын болбаазырадыр келир үениң стратегтиг инвестору Тожуну чырык-биле хандырар айтырыгны мооң мурнунда Роснедрже киирген турган. Роснедрниң аукционунуң түңнелдери-биле Ак-Сугнуң чес-порфир чыдынын болбаазырадыр эргени "Перспективтиг даг-руда төлевилелдери" компания ("Ростех" ДК структуразы) ойнап алганын Тываның Баштыңы Владислав Ховалыг бодунуң блогунда дыңнаткан.
Тывада Ак-Сугнуң чес-порфир чыдынынга келир үениң даг-болбаазырадылга комбинадынче чырык дамчыдар шугумну тудар ажылдар чоруп турарын сагындыраал. 312 км-ге шөйлү бээр электри чырыының чаа шугуму республиканың Бии-Хем биле Тожу кожууннарын таварып эртер. Ону «Россеть» компания тудуп турар. Ак-Сугнуң электрификациязы амгы үеде дизельдиг генераторларны ажыглап турар Тожу кожуунну чырык-биле хандырар ужурлуг деп, Владислав Ховалыг чугаалаан. Комплекстиг планда чуртталга тудуу калбаа-биле чоруп турар Кызыл хоорайның чырык күчүзүн улгаттырарын шиитпирлээр айтырыг база кирген.
«Ростех»-биле кады ажылдажылгавыс чаа деңнелже шилчээн. Чыл бурунгаар даг бүдүрүлгелеринге ажыглаар частыр чүүлдер бүдүрүлгезиниң салбырын Тывада ажыткан. Эрзин кожууннуң Тастыгда литий чыдынын болбаазырадыр база бир структура ажылдап эгелээн. Чурттуң Президентизи Владимир Владимирович Путин сентябрь 2-де Тывага эрттирген хуралында ол ажылдың стратегтиг ужур-дузазын демдеглээн.
"Инвестиция төлевилелдеринге кадрлар белеткээриниң кады ажылдажылгазы эгелээн. Россияның бирги вице-премьери Денис Валентинович Мантуровтуң хуралында Тожу кожууннуң электрофикациязын база чугаалашкан. Бо пункт Тываның энергетика хандырылгазының комплекстиг планынче кирген. Лизенция алыр ажыл доосту бээрге-ле, инвестор-биле улуг хемчээлдиг Дугуржулгага аттарны салыр бис" – деп, Тываның Баштыңы бодунуң блогунда дыңнаткан.
Регионнуң девискээринге улуг күрүне корпорацияларының көвүдээри, бирээде, инвесторларның боттарынга алган хүлээлгелеринге харыысалгазын бедидип, ийиде - Тываның социал-экономиктиг хөгжүлдезинге эки салдарлыг болурун Владислав Ховалыг демдеглээн.