Республиканың Баштыңы Владислав Ховалыг Тываның журналистер эвилелиниң 65 чылы биле Бүгү-делегейниң телевидение хүнүнге тураскааткан хемчегге киришкен. Республиканың «Тува 24» база «КТРК «Тыва» башкарыкчы телеканалдарының журналистери болгаш хоочуннары, Тываның Журналистер эвилелиниң кежигүннери байырлалга киришкен.
Республиканың Баштыңы журналисчи ниитилелге дорт хамаарылгалыын байыр чедириишкининге демдеглээн:
«Мээң ачам – Товарищтай Сарыг-оолович Ховалыг бодунуң үезинде «Тываның аныяктары» солунга ажылдап чораан. Бүгү чуртталгазын бараалгатканы башкы эртеминден аңгыда, партийжи школага чедип алганы журналист эртеми база бар» – деп, Владислав Ховалыг сонуургаткан. Тываның социал-экономиктиг хөгжүлдезин чырыдарынга, республиканың көскү чаартылгаларын ниитилелге дүрген дамчыдарынга журналисчи ниитилежилгениң чугула ужуру-дузалыг онза ролюн айыткан.
Республиканың Баштыңы журналисчи ниитилежилгениң идепкейжи хамааты туружу дээш четтиргенин илередип, Тываның чаагай чоруу дээш ажылынга чедиишкиннерни күзээн. Тываның Журналистер эвилелиниң 65 чылдаан юбилейнде шылгараңгай ажылдыг кежигүннерге күрүне шаңналдарын тывыскан.
«Улуг-Хем» кожуун солунунуң хоочуну, Россияның Журналистер эвилелиниң кежигүнү Александр Кенденович Натпит-оолга база «Тыва» КТРК»-ның телевидение база радиодамчыдылгазының темалыг программалар албанының башкарыкчызы Саяна Май-ооловна Ондурга тыва журналистиканың хөгжүлдезинге ачы-хавыяазы болгаш хөй чылдарда ак сеткилдиг ажылы дээш «Тыва Республиканың алдарлыг журнализи» хүндүлүг атты тывыскан.
Тываның күрүне тугунуң автору, күш-ажылдың хоочуну Сат Оюн-оол Доктугу–оглун культура болгаш уран чүүл адырында бедик мергежили болгаш ачы-хавыяазы, хөй чылдарда ак сеткилдиг күш-ажылы дээш Тыва Республиканың «Тыва Республиканың мурнунга ачы-хавыяазы дээш» медаль-биле шаңнаан.
Тываның Баштыңының тыва журналистиканың хоочуннары-биле аңгы ужурашкан. Журналистер эвилелиниң хоочуннар чөвүлелин тургузар, регионалдыг «Тува 24» база «Тыва» КТРК» телеканалдарга тыва дылда дамчыдылгаларның үезин көвүдедир дугайында санал-оналдар кирген. Хоочуннар тудуг, энергетика, көдээ девискээрлерни хөгжүдер адырда Тывада боттандырып турар төлевилелдер дугайында боттарының үзел-бодалары-биле үлешкен.
1959 чылдың январь 27-де болуп эрткен Тыва АССР-ниң журналистер эвилелиниң бирги съездизинде Эвилелди журналистерниң эки турачы чогаадыкчы хөй-ниити организациязы кылдыр тургускан. 1959 чылдың январь 31-де «Шын» солунунда Салчак Тамба съездиниң ажылынга 13 кижи киришкенин бижээн. Оргкомитет даргазының оралакчызы Кужугет Шойгу отчеттуг илеткелди кылган. Бөгүн Тываның Журналистер эвилелинде 173 кижи бактаап турар.