Тываның орук-транспорт комплекизиниң яамызы, улуг күрүне организациялары - «Тыва Республиканың автомобиль оруктарының эргелели» ККА, «Орук шимчээшкинин организастаар төп» ТР КУБ, «Тываның авиашугумнары» АК» РКБ, орук-транспорт ажыл-агыйының муниципалдыг болгаш хуу албан черлериниң коллективтери боттарының профессионал байырлалын демдеглеп эрттиргеннер.
Тываның Баштыңы адыр көскү чедиишкиннерлиг болгаш хөгжүлделиг бурунгаарлап олурарын демдеглеп, транспорт ажыл-агый адырының шупту төлээлеринге байырны чедирген:
“Ук адырның шупту ажыл-ишчилеринге профессионал байырлалыңар-биле байырым чедирдим! Силерниң күш-ажылыңар ачызында орук-транспорт адыры бурунгаар хөгжүлдени алган. Республиканың кызыгаар чоогунда туружу база ону таварты Азияже транзит оруун тургузарының перспективаларынга Тываның келир үези дээш силерниң күш-ажылыңар онза ужур-дузалыг” – деп, Владислав Ховалыг бижээн.
Кызылдың аэропортунга Россияда улуг самолет – 184 олуттуг Airbus A-320 класстыг агаар суднозун хүлээп алганы – чүгле бо чылда эвес, а сөөлгү он чылдарда адырның бир улуг чедиишкини. Новосибирскиден шенеп ушкан рейс Кызылдың чаартынган аэропорту улуг борттарны хүлээп ап шыдаарын бадыткаан. Мооң мурнунда Кызылдың аэропортунуң ужудуп-хондурар шөлү улуг агаар судноларын хүлээп шыдавас турган. Ам өскээрден ужуп келген ужудукчуларның демдеглээни-биле алырга, ужудуп-хондудар шөлдүң шынары эки.
Бо чылын «Сибирь» (S7) авиакомпания неделяда ийи катап ужудар Кызыл - Иркутск - Кызыл авиарейизин ажытканы – транспорт адырында улуг чедиишкин. 2024 чылдың июньда «Сибирь» (S7) авиакомпания Кызыл - Новосибирск - Кызыл аразының хүннүң ужар авиарейстерин организастаан. Чайгы үеде Кызыл - Москва - Кызыл авиарейстерин неделяда алды катап, а Кызыл - Красноярск - Кызыл рейсти хүннүң ужударын чедип алган.
2024 чылдың январь-сентябрьда регионнар аразының маршруттарынга 103 муң ажыг пассажир аргышкан, эрткен чылдың ол үезинге деңнээрге 25 хуу хөй. 2024 чылдың төнчүзүнге чедир регионнар аразының авиарейстеринге 120 муң хире пассажирлерни аргыштырары планнаттынган.
Бо чылда республиканың кол аалчызы, Россияның Президентизи Владимир Путин республиканың найысылалындан кожа Моолдуң найысылалынче ужуп чорупканы – Тываның төөгүзүнде бирги делегей чергелиг авиаужудуушкун болган.
Чер кырының транспортундан алырга, пассажирлер саны база-ла өскен. 2024 чылдың январьдан августка чедир автобустарның доктаамал маршруттарынга 9,5 млн пассажирлер аргышкан, 2023 чылдың январь-августка деңнээрге 3,5 хуу хөй. Бо чылын Кызыл агломерациязында чурттакчы чонну хандырарынга 20 санныг чаа автобусту саткаш, 113 база 108 дугаарлыг маршруттарже салган. Тыва Республиканың чурттакчылыг суурларынче транспорттуң чедингирин хандырар дээш, "Кызыл - Ак-Довурак - Кызыл", "Кызыл - Эрзин - Кызыл", "Кызыл - Тээли - Кызыл", "Кызыл - Хандагайты - Кызыл" дээн ышкаш муниципалдар аразында муршруттарга пассажирлерниң доктаамал аргыжылгазын тургускан. Чүгле тос айлар дургузунда 25 муң пассажирни аай-дедир аргыштырган.
Адырның 2025 чылда мурнады боттандырар айтырыы – агаар судноларының парыгын чаартыры база регионнар аразынга база тус черниң агаар шугумнарынга авиаргыжылганың маршрут четкизин сайзыраңгайжыдар. Ол ышкаш «Хандагайты» автомобиль эрттирилге пунктузунуң эде чаартылгазын дооскаш, хөй талалыг чурумга ажылдаар кылдыр ажыдар. Кызыл хоорайга автовокзалды тудары база республиканың кожуун төптеринге автостанцияларны организастаары – шиитпирлээр айтырыглар бооп артпышаан.