Ноябрьның 18-22 хүннеринде, Тываның өөредилге организацияларынга эрге-хоойлу билиглериниң неделязы болуп турар. Тыва Республиканың Чазааның чанында Назы четпээннер херектериниң болгаш оларның эргелерин камгалаар талазы-биле ведомстволар комиссиязының инициативазы-биле назы четпээннерниң эрге-хоойлу культуразын хевирлээринче база оларның аразында корум-чурум үрээшкиннеринге удур профилактикаже угланган кампания чылда ийи катап чоруп турар. Уруг бичии турда-ла эрге-хоойлу билиглериниң эге билиглерин, ооң эргелериниң, хүлээлгелериниң, харыысалгазының дугайында чиге билиишкинни угаадыры чугула деп, организаторлар демдеглээн.
Суд участогунуң эптештирилге судьязының дузалакчызы понедельникте Тываның даг-техниктиг техникумунуң сургуулдарынга эргелер болгаш хүлээлгелер дугайында лекцияны номчаан. Оолдар-уруглар кичээнгейлиг дыңнааш, уругларның эргелериниң дугайында билип алганын чугаалап, чамдыктары назы четпээннер дугайында хоойлужудулганы элээн хандыр өөренир күзелин илереткен.
Дараазында хүнде ,Тожу кожууннуң прокурорунуң дузалакчызы ИТТ адырында мегелээр бузурукчу чорук дугайында чугаалап берген. Сургуулдар харылзааның өске ужунда бузурукчуну канчаар билип алырын, ындыг звонокка канчаар харыылаарын, интернет–садыглажылгадан бодун канчаар камгалаарын билип алганнар. Ол ышкаш микрозаймнарның айыылын кончуг таптыг тайылбырлап берген. Неделя дургузунда студентилер корум-чурум үрээшкиннерге удур профилактикаже база оларның эрге-хоойлу культуразын бедидеринче угланган элээн каш лекцияларга олуржур.
Эрге-хоойлу билиглериниң неделязы Каа-Хем кожууннуң Сарыг-Сеп суурда С.К. Тока аттыг 2 дугаар школаның 8-9 класстың өөреникчилеринге кожуун чагыргазында өг-бүле, аныяктар болгаш спорт килдизиниң начальнигиниң база чагыргада назы четпээннер херектериниң болгаш оларның эргелерин камгалаар талазы-биле комиссияның харыысалгалыг секретарының назы четпээннерниң административтиг болгаш кеземче харыысалгазының дугайында профилактиктиг беседазындан эгелээн.
Неделя дургузунда 500 хире профилактиктиг хемчеглерни эрттирери планнаттынган. Республиканың шупту хоорай, суурларында 95 өөредилге организацияларын: 16 техникумну база 79 школаны хаара тудар. Прокуратураның, Истелге комитединиң, Иштики херектер яамызының, Хамааты камгалал база онза байдалдар агентилелиниң, ОБЯ-ның Тывада кол эргелелиниң, Кеземче күүселдезиниң федералдыг албанының, Шүүгү яамызының эргелелдериниң, район болгаш эптештирилге судтарының, нотариус, адвокат палаталарының, регионалдыг спорт, культура яамыларының болгаш өске-даа органнарның төлээлери янзы-бүрү темалыг лекциялар, викториналар, экскурсияларны эрттирер. Республиканың Кадык камгалал яамызындан төлээлер элээдилерниң эр-кыс кижизидилгезинче угланган беседаларны чорудар.