Келир четвергде, ноябрьның 28-те, Тываның найысылалынга Енисей Сибирин хөгжүдер корпорация-биле республика Чазааның организастааны ажыл-агыйжы хемчег Енисей Сибириниң регионнарының инвестиция санал-оналдарын таныштырар шөл апаар.
Чүгле Тывага эвес, а бүгү Сибирь федералдыг округунга улуг ужур-уткалыг хемчегге инвестиция адырында бизнес-ниитилежилгелерниң болгаш эксперттерниң 50 ажыг төлээлери киржир. Киржикчилер инвесторларның боттары-биле боттарының төлевилелдерин сайгарар арганы алыр.
Тываның Баштыңы Владислав Ховалыг социал четкилерде бодунуң блогунда болур болуушкунну дыңнаткан. «Үлетпүр, тудуг, туризм болгаш көдээ ажыл-агыйда боттандырып турар инвестиция төлевилелдерин хары угда база калбаа-биле конференцияга таныштырар херек» - деп, демдеглээн.
Инвестиция конференциязының үезинде эксперттерниң дузазы-биле республиканың чазаа регионда инвестиция байдалын экижидер болгаш ажыл-агыйжы идепкейни күштелдирериниң алыс кедизин анализтээр деп, Тываның Баштыңы дыңнаткан.
Конференцияның шөлчүгештеринге чүгле Тывага эвес, а бүгү Сибирьге хөгжүлдениң болгаш салыышкыннарның перспективтиг чаа адырларын айтып, сайгарар. Моол база Кыдат-биле ажыл-агыйжы харылзааны хөгжүдеринче кол кичээнгейни углаар. Тываның кызыгаар туружун болгаш регионнуң девискээри-биле транзитти тургузарының аргаларын барымдаалап, Сибирь регионнарының ол девискээрлерге бизнести хөгжүдеринге сонуургалдыы республикага кончуг чугула дээрзин Владислав Ховалыг онзалап демдеглээн.
Конференцияның аалчылары Кызылда үлетпүр болгаш тудуг шөлдеринче үнүүшкүннерни организастап, ол ышкаш Таңды болгаш Кызыл кожууннарда турисчи төлевилелдер шөлдерин таныштырар.Инвестиция төлевилелдерин боттандырарынга сонуургалдыг шупту кижилерни, ол ышкаш хуу кады акшаландырыышкынга хереглелдиг инициаторларны конференцияга киржир кылдыр чалаан. Аңаа киржирде анкетаны долдурары албан.