Россияның регионнары, Тыва база, чаа төрүттүнген чаштарның төрүмелинден база ук-салгалындан келген аарыгларын калбаа-биле шинчилээр хемчеглерни хандырарынга федералдыг бюджеттен немелде субсидияларны алыр. РФ-тиң Чазааның даргазы Михаил Мишустин ноябрь 6-да ооң дугайында айтыышкынга атты салган.
Ниитизи-биле 770 млн рубльди ындыг шинчилелдер чорударынга немелде деткимче кылдыр регионнарга хувааган, а Тываже 4,8 млн рубльди чоруткан. 2022 – 2025 чылдарда санаан “Чаа төрүттүнген чаштарның калбак шиничилгезин хандырары” регионалдыг программаның ооң-биле кады ниити акшаландырыышкыны 71,9 млн. рубль тургаш, ам 76,8 млн. рубль четкен.
Бичии чаштың баштайгы хонуунда-ла эрттирер неонаталдыг скрининг аар аарыглар барын эге чадазында тодарадып, чугула эмчи дузазын дүрген чедиреринге дузалаар. Чүгле 2023 чылда Тывада 5 муң ажыг хензиг чаштар скрининг шинчилелин эрткен. Ийи чашта ховар таваржыр ук-салгал аарыы - метилмалоновая ацидурия илереттинген, 19 өпеяны катап шинчилелче чоруткан.
Скриниг түңнелинде аарыг болган чаштарны Россияның Президентизиниң инициативазы-биле тургустунган «Круг добра» фонд деткип, аар өртектиг эмнээшкинниң чогуур эмнери-биле хандырар. Ынчангаш федералдыг-даа, регионалдыг-даа эрге-чагырга аар өртектиг эмчи дузазы херек уругларны илередир дээш чаа төрүттүнген шупту чаштарны скрининг шинчилелинче калбаа-биле хаара тудуп турар.