Тывага энергетика хандырылгазының комплекстиг планын боттандырарының чорудуун Владислав Ховалыг Россияның энергетика сайыды Сергей Цивилев-биле чугаалашкан. Россия Чазааның Даргазының бирги оралакчызы Денис Мантуровтуң республиканың инфраструктура хөгжүлдезиниң айтырыгларынга федералдыг ведомстволар-биле кады ажылдаар даалгазы езугаар Тываның Баштыңы бо хүннерде федералдыг яамыларда ажылын уламчылаан.
Республика девискээринде үлетпүр болгаш социал адырларда инвестиция төлевилелдериниң энергетика хандырылгазы РФ-тиң энергетика сайыды-биле чугааның кол темазының бирээзи болган. Тываның найысылалынга комплекстиг хөгжүлде болгаш инфраструктура объектилерин хандырар дээш Кызылга бедик вольттуг “Эне-Сай” электри подстанциязын (110 кВ подстанция) тудары дээш өске-даа айтырыглар РФ-тиң Чазааның Даргазының бирги оралакчызының даалгаларында кирген.
«Кызылга тудугну хөгжүдеринге подстанция энергетиктиг күчү-күштү хандырар – деп, Тываның Баштыңы Владислав Ховалыг бодунуң блогунда онзалап демдеглээн. – Тываның, «Россетьи» компанияның болгаш федералдыг яамыларның кады күжениишкиннеринден чедиишкин хамааржыр. Аңаа кижи бүрүзүнүң тодаргай туружу чугула».
Бистиң республиканың энергетика курлавырын хөгжүдер ажылга РФ-тиң энергетика сайыдының деткимчезин Владислав Ховалыг дыңнаткан. Амгы үеде Барун-Хемчик кожууннуң Эрги-Барлык суурдан Мөңгүн-Тайгаже 4-5 чыл дургузунда шөйери планнаттынган чырык дамчыдар шугум тудуушкунунга санаашкыннарны кылып турар. Ам федералдыг Энергетика яамызының деткимчези-биле бо хөй миллиард түңнүг төлевилелди боттандырар акшаландырыышкын дөстерин дилеп турар. Тываның Баштыңы мооң мурнунда Мөңгүн-Тайга кожуунну республиканың чаңгыс аай энергетика системазынче кожары хереглекчилерниң үзүк чок чырык хандырылгазын алырындан аңгыда, ол девискээрниң экономиктиг курлавырын бедидер дээрзин онзалап демдеглээн.
Тываның Баштыңы ол ышкаш Сергей Цивилев-биле ужуражып тура, чырык-энергетика рыногунда мөөңнеп садар өртектерни өйлеп-таарыштырарының айтырыынга доктаап, демир-орук-биле хөмүр сөөртүрүлгезинге квотаже база регионнуң хөмүр-даш үлетпүрүнде ниити байдалче кичээнгейни угландырган.
«Бистиң компанияларывыстың хөмүр-дашты үндүр сөөртүрүнге демир-орук квотазын кадагалап арттырарының болгаш улгаттырарының аргаларын магадылаарын, ооң иштинде чурттакчы чонга чиигелделиг өртекти хевээр арттырарын кады ажылдап көөрүн дугуруштувус» - деп, Владислав Ховалыг дыңнаткан.
РФ-тиң Энергетика яамызының удуртукчузу республиканың хөмүр-даш тывыжының бүдүрүлгелериниң ажылынче онза кичээнгейни салып турарын, оларның үзүктел чок ажылы Тываның социал-экономиктиг хөгжүлдезинге чугула дээрзин демдеглээн.
«Арыг агаар» күрүне программазы-биле Тываның муниципалдыг тургузугларынга хөмүр одаар амгы үениң котелдарын кедизинде тургузарының айтырыын база чугаалашкан.
Хөмүр-даш хереглекчилерге эң-не чедимчелиг энергия курлавырларының бирээзи бооп артпышаан, ынчалза-даа экологтуг арыг болгаш энергияга камналгалыг амгы үениң дериг-херекселдерин ажыглаары амыдыралдың шынарын элээн экижидер деп, Цивилев демдеглээн.