Тывадан декабрь ортан үезинде Луганск болгаш Донецк Улус Республикаларже аъттаныр 20 тоннаның чүък машиназынга гуманитарлыг ачы-дуза чыылдазы бо хүннерде эгелээн. Регионнуң чазаа бо удаада доңурган эътти чорудар деп шиитпирлээн, кожууннарда чыылда шалыпкын чоруп турар.
Улусчу фронтунуң регионалдыг салбырының удуртукчузу Саима Далчин чыылда үезинде аъш-чем база эът аймаан, техниктиг дериг-херекселдерни база чаштынар четкилер санын үлей хуваап турарын дыңнаткан.
«Дайынчыларның техниктиг дериг-херекселдерге дилээн база өөренип тур бис. Эътти, чаштынар четкилер, чылыг хептер база эм аймаан албан чедирер, а радиоэлектроника чалгыын базар, квадрокоптерлар болгаш тепловизорлар дээн ышкаш техниктиг дериг-херекселдер садып алырынче акшаны көвүдедир чыып алыксаан ийик бис» — деп ол демдеглээн.
Декабрьның 10-га чедир гуманитарлыг ачы-буянның чада аайы-биле чыылдазын доозарын муниципалитеттерге сагындырган. Ооң бирги чадазы ноябрь 24-те доостур, ооң соонда декабрь 10-га чедир база каш чыылданы организастаар. Тыва Республиканың Дээди Хуралында (парламентиде) база Улусчу фронтунуң күүсекчи комитединде чыылда пунктулары ажылдап турар.
2024 чылдың эгезинден бээр күүсекчи эрге-чагырганың федералдыг органнары база аңгы-аңгы организациялар элээн каш транспорт аймаан тускай шериг операциязының зоназынче дамчыткан. Ылаңгыя 55115 дугаарлыг база өске-даа шериг кезектеринче чиик болгаш чүък машиналарын дамчыдып, шериглерниң аай-дедир шимчээшкининге дузаны каткан.
Дайынчы даалгаларны чедиишкинниг күүседиринге чиик машиналар дыка херек деп, Саима Далчин айыткан. «Машиналар бо-ла сандан үнүп, үрели бээр чарыгдал материалы болганда, дайынчыларывыска ол болгаш өске-даа техниктиг чүүлдер-биле дузаламчы доктаамал херек» — деп, чугаалаан.
Улусчу фронтунуң организастааны гуманитарлыг ачы-дуза чыылдазының пунктулары бүгү Россияда ажылдап турар болгаш, «Бүгү чүвени тиилелгеге дээш!» деп федералдыг төлевилелдиң күүселдези болур. Тываның дайынчыларынга техниктиг дериг-херекселдер садып алырынга дуза кадыксааннар QR-кодту ажыглап азы чыылданың – сбор.17 регионалдыг агар-санын айтып, акшаны шилчидип болур. Харылзажыр телефону – 2-10-50.