Ноябрь 15-те, пятницада, «Национал политика. Тыва» деп регионалдыг өөредилге шуулганы республикага бир дугаар болуп эртер. Республиканың Национал херектер агентилелиниң демдеглээни болза, регионга ужур-уткалыг болуушкунда Тыва Республикада чурттап турар хөй язы-сөөк чоннарның культуралыг онзагайларын болгаш социал демнежилгезин, национал политиканың чугула айтырыгларын чугаалажыр.
Республиканың тус чер бот-башкарылга органнарының төлээлери, күрүнениң национал политика адырында специалистер, ол ышкаш хөй-ниити организацияларының баштыңнары – шуулганның кол киржикчилери. Москвадан болгаш кожавыс Хакасиядан эксперттер өөредилгени эрттирер. Спикерлерниң аразында Хакас Республиканың Национал болгаш территориалдыг политика сайыдының оралакчы Юрий Чертыков, яамының килдис начальниги Михаил Барсуков, Хакасияда тыва чаңгыс чер чурттугларның «Энерел» регионалдыг хөй-ниити организациязының даргазы Болат Сат болгаш өскелерниң-даа киржири бөгүн билдинген.
Аныяктар өргээзинге эртер шуулган концерт программазы-биле эртенгиниң 9 шакта эртер. Республиканың удуртулгазы аалчыларга болгаш киржикчилерге байыр чедирген соонда, пленарлыг кезээ эгелээр. Шуулган Аныяктар өргэзинге база Орус культура төвүнге дөрт аңгы шөлге уламчылаар. Хүннүң бирги чартыында ийи аңгы секцияга: Россия Федерациязының күрүнениң национал политиказын боттандырарының айтырыгларын чугаалажып, ол ышкаш Сибирь регионнарының арга-дуржулга солчулгазы болур. «Российжи чаңчылчаан сагыш-сеткил-мөзү-бүдүш үнелиг чүүлдерин кадагалап арттырар база быжыглаар талазы-биле күрүне политиказын боттандырарының дугайында» айтырыг – ийиги тема.
Дүштеки чапсар соонда, ийи аңгы секцияның киржикчилери Россия Федерациязының Соңгу чүк, Сибирь база Ыраккы чөөн чүктүң эвээш санныг үндезин чоннарының турум хөгжүлдезиниң Концепциязын база Чоннар аразында база шажыннар аразында харылзааны тудар, чөрүлдээлиг байдалды баш бурунгаар болдурбас адырда күрүнениң информастыг мониторинг системазы-биле ажылдаарын сайгарып чугаалажыр.